دادو (نمائندہ جسارت) دادو میں یوم دفاع کی مناسبت سے پاک فوج کے شہداء اور غازیوں کو خراج پیش کرنے کے لیے سندھ یونیورسٹی کیمپس دادو میں پرو وائس چانسلر ڈاکٹر اظہر علی شاہ کے زیر اہتمام پروقار تقریب کا انعقاد کیا گیا۔ تقریب میں لیفٹیننٹ کرنل سردار علی شاہ، ایس ایس پی دادو اعجاز احمد شیخ کی مہمان خصوصی طور شرکت کی جبکہ تقریب میں کیمپس کے طلبہ، طالبات والدین اور سول سوسائٹی کے نمائندوں نے شرکت کی۔ اس موقع پر کیمپس کے طلبہ اور طالبات نے یوم دفاع کی مناسبت سے شہداء اور غازیوں کو تقاریر، ملی نغمے اور شاعری پیش کرکے خراج عقیدت پیش کیا۔ استاد بخاری ڈگری کالج، پرنسپل محمد عرفان کلہوڑو کی قیادت میں پاکستانی پرچم بینر اور پلے کارڈ اٹھا کر ریلی نکالی گئی۔ ریلی میں اساتذہ، طلبہ اور کالج اسٹاف نے بڑی تعداد میں شرکت کی۔ سندھ فنکار ویلفیئر کی جانب سے سید منور علی شاہ، رفیق زئونر اور دیگر کی قیادت میں موندر ناکہ سے پریس کلب تک ریلی نکالی گئی۔ ریلی میں سندھی انٹرٹینمنٹ میڈیا کے اداکاروں، گلوکاروں سمیت دیگر نے بڑے تعداد میں شرکت کی۔
