لاڑکانہ(نمائندہ جسارت) لاڑکانہ پولیس نے مبینہ مقابلے میں ڈاکو کو زخمی حالت میں گرفتار کرکے اسلحہ برآمد کرلیا ہے۔اس حوالے سے ایس ایس پی لاڑکانہ عمران قریشی نے بتایا کہ لاڑکانہ پولیس نے سیلرا روڈ پر جرائم کے ارادے سے کھڑے ملزمان نے گشتی پولیس کو دیکھ کر فائرنگ کردی جس دوران مقابلے میں پولیس نے ایک ڈاکو علی شیرعرف شیرو ولد فضل الدین جتوئی کو زخمی حالت میں گرفتارکرکے اسلحہ برآمد کرلیا جبکہ اس کے دیگر ساتھ فرار ہوگئے تاہم سیلرا روڈ کے کوہری پل والے علاقے کی سرچ آپریشن بھی کیا گیا ہے۔انہوں نے بتایا کہ گرفتار ڈاکو پر ضلع قنبر شہداد کوٹ کے تھانہ میروخان، سجاول، ضلع لاڑکانہ کے تھانہ لاشاری اور تھانہ رتودیرو پر سنگین نوعیت کے مقدمات درج ہیں۔دوسری جانب لاڑکانہ شہر کے تھانہ ولید کی حدود شیخ زید کالونی سٹی اسکول کے قریب گزشتہ شب نامعلوم مسلح افراد نے شہری محمد شریف شیخ کو اسلحے کے زور پر یرغمال بناکر موبائل فون، 10 ہزار روپے نقدی، شناختی کارڈ اور بینک چیک لوٹ کر فرار ہوگئے اطلاع پر حد کے تھانہ کی پولیس نے پہنچ کر تفصیلات معلوم کرکے تفتیش شروع کردی ہے۔ پولیس کے مطابق ملزمان کی گرفتاری کے لیے چھاپے مارے جارہے ہیں جنہیں تمام جلد گرفتار کرکے قانون کی گرفت میں لایا جائے گا۔
