گھوٹکی(نمائندہ جسارت) پاکستان پیپلز پارٹی کے چیئرمین بلاول زرداری نے دعویٰ کیا ہے کہ آئندہ حکومت ہماری ہوگی۔ گھوٹکی میں تقریب سے خطاب کے دوران بلاول زرداری نے کہا کہ ہم غریب عوام کی ترقی چاہتے ہیں، پیپلزپارٹی نے ہمیشہ عوامی فلاح وبہبود کے لیے کام کیا ہے، ہماری جدوجہدغربت کے خلاف ہے، آصف زرداری بینظیر انکم سپورٹ پروگرام لائے، نواز شریف اورعمران خان بے نظیرانکم سپورٹ پروگرام کے مخالف تھے، مخالفین بینظیر انکم سپورٹ پروگرام کا مذاق اڑاتے تھے لیکن دنیا نے بے نظیر انکم سپورٹ پروگرام کو سراہا۔چیئرمین پیپلز پارٹی نے کہا کہ موجودہ حکومت نے کچھ نیا نہیں کیا صرف پیپلز پارٹی کی نقل کی ہے، آئندہ حکومت پیپلز پارٹی کی ہوگی اور ہم انکم سپورٹ پروگرام بہتر انداز میں چلائیں گے، ہم عورتوں کو معاشی اور سیاسی لحاظ سے طاقتور بنانا چاہتے ہیں، خواتین ترقی کریں گی تو پورا پاکستان ترقی کرے گا۔ وہ دن دور نہیں جب نثار کھوڑو اور مراد علی شاہ کی جگہ خواتین کام کریں گی۔بلاول زرداری نے کہا کہ موجودہ حکومت میں لوگ بیروزگاری اور مہنگائی کی وجہ سے مشکل میں ہیں، احساس کہنے والوں کو احساس ہی نہیں ہے، عوام مہنگائی کے سونامی میں ڈوب رہے ہیں، عمران خان نے 50 لاکھ گھر بنانے کا وعدہ کرکے الٹاغریبوں کے گھر گرادیے گئے۔
