لاہور (صباح نیوز) وزیر جیل خانہ پنجاب فیاض الحسن چوہان نے کہا ہے کہ بلاول زرداری عثمان بزدار کو کٹھ پتلی کہنے سے پہلے اپنے گریبان میں جھانکیں، آصف زرداری کی کٹھ پتلی سندھ کابینہ اوررشتہ دار وزیر ہر محاذ پر فیل ہیں، عثمان بزدار آئے روز پرفارمنس کے نئے سنگ میل عبور کر رہے ہیں۔ بلاول کے بیانات پر ردعمل دیتے ہوئے انہوں نے کہا کہ بلاول زرداری کچی عمر میں آصف زرداری سے منفی سیاست کے سارے گر سیکھ چکے ہیں، وزیراعلیٰ پنجاب نے اپنی پرفارمنس سے تمام وزرائے اعلیٰ کومات دی، پنجاب نے کورونا کو مات دی، سندھ کورونا کے سب سے زیادہ کیسز پیدا کرتا رہا ہے۔ مراد علی شاہ کے سندھ اور عثمان بزدار کے پنجاب میں زمین آسمان کافرق ہے۔انہوں نے کہا کہ پنجاب صحت انصاف کارڈ اور یونیورسٹیاں بنا کر عوام کا بوجھ بانٹ رہا ہے جبکہ سندھ نے صاف پانی اورصحت کی مناسب سہولتیں بھی عوام سے چھین لیں۔
