لاڑکانہ (نمائندہ جسارت) خیرپور ناتھن شاہ اور نصیرآباد روڈ پر دو مختلف حادثات میں نوجوان جان بحق اور چار افراد زخمی ہوگئے۔ دادو ضلع کی تحصیل خیرپور ناتھن شاہ تعلقہ اسپتال کے قریب تیز رفتار کار اور چنگ چی رکشے میں ٹکر کے نتیجے میں گاؤں مراد چانڈیو کا رہائشی دو بچوں کا باپ 25 سالہ نوجوان صدام حسین چانڈیو سمیت چار افراد شدید زخمی ہوئے جنہیں ورثاء کی جانب سے چانڈکا اسپتال کے شعبہ حادثات منتقل کیا گیا جہاں دوران علاج زخموں کے تاب نہ لاتے ہوئے نوجوان دم توڑگیا جبکہ تین زخمیوں کو فوری طور پر تعلقہ اسپتال کے این شاہ منتقل کیا گیا جن کی حالت خطرے سے باہر بتائی جاتی ہے۔ دوسری جانب نصیر آباد روڈ پر تیز رفتار کار کا ٹائر پھٹنے کے نتیجے میں قنبر کے نواحی گاؤں کے رہائشی تین افراد سدھیر برڑو، عبدالصمد برڑو اور سعید بلیدی شدید زخمی ہوئے، جنہیں موٹر وے پولیس کی جانب سے زخمی حالت میں چانڈکا اسپتال کے شعبہ حادثات منتقل کیا جہاں انہیں طبی امداد دی گئی۔
