ساہیوال ،دکاندار ،بیوپاری نقدی موبائل اور موٹرسائیکل سے محروم

ساہیوال (این این آئی) ڈاکو چار بیوپاریوں اور چار دکانداروں سے 6 لاکھ 44 ہزار روپے نقد، چار موبائل اور دو موٹر سائیکل لوٹ کر فرار ہوگئے۔ چک 81 فائیو ایل کے قریب دو ڈاکوئوں نے پستول دکھا کر بیوپاری ظفر اقبال سے 93 ہزارروپے کی نقدی اور موبائل لوٹ لیا۔ چک55 فائیو ایل کے قریب دو ڈاکوئوں نے پستول دکھا کر محمد عباس دکاندار سے نقدی پانچ ہزار روپے اور موٹر سائیکل نمبر6356۔او کے کے چھین لی اور فرار ہوگئے۔ چک 66 فور آر کے قریب بیوپاری نصیر احمد خاں سے چار ڈاکوئوں نے نقدی 57 ہزار روپے، چار لاکھ روپے کے دو مویشی اسلحہ کے زور پر لوٹ کر لے گئے۔ اورنگ آباد کے قریب دکاندار وقار حسین سے تین ڈاکوئوں نے نقدی 5 ہزار روپے اور موبائل پستول دکھا کر چھین لیا اور فرار ہوگئے۔ چک 59 جی ڈی کے دکاندار محمد امین سے سرور چوک میں دو ڈاکوئوں نے پستول دکھا کر نقدی 95 ہزار روپے اور موبائل چھین لیا اور فرار ہوگئے۔ چک 86 سکس آر کے قریب بیوپاری ارباب اشرف سے 14 ہزار 500 روپے کی نقدی اور موبائل چھین کر دو ڈاکو فرار ہوگئے۔ چک 57 فائیو ایل کے قریب سبزی فروش ظفر اقبال سے دو ڈاکوئوں نے پستول دکھا کر 4600 روپے کی نقدی اور موبائل چھین لیا۔ بلال کالونی میں تین ڈاکوئوں نے پستول دکھا کر بیوپاری محمد یٰسین سے موٹر سائیکل اور نقدی 30 ہزار روپے چھین لی اور فرار ہوگئے۔ پولیس یوسف والہ، نور شاہ، بہادر شاہ، فرید ٹائون اور فتح شیر نے ظفر اقبال، محمد عباس، نصیر احمد خاں، وقار حسین، محمد امین، ارباب اشرف، ظفر اور محمد یٰسین کی مدعیت میں 8 مقدمات درج کر کے تفتیش شروع کردی ہے۔ فرید ٹائون قبرستان کے گیٹ پر دو موٹر سائیکل سوراوں نے ڈاکٹر واصف مشتاق کو گولی مار دی۔ واقعے کے مطابق ڈاکٹر واصف مشتاق چک 150 نائن ایل میں ڈیوٹی سے واپس اپنی کار میں فرید ٹائون جارہا تھا کہ دو موٹر سائیکل سواروں نے رکنے کا اشارہ کیا، ڈاکٹر نے کار نہ روکی تو ملزمان نے گولی مار دی۔ ڈاکٹر واصف مشتاق کو شدید زخمی حالت میں اسپتال داخل کرا دیا، جہاں ڈاکٹر واصف مشتاق کی حالت خطرے سے باہر ہے۔ پولیس فرید ٹائون نے دو نامعلوم ملزمان کیخلاف ڈاکٹر کے چچا حامد علی کی مدعیت میں مقدمہ درج کرلیا۔ ابھی تک ملزمان کا سراغ نہیں مل سکا۔