ٹھٹھہ(نمائندہ جسارت)ایس ایس پی ٹھٹھہ ڈاکٹر محمد عمران خان کی خصوصی ہدایات پر جرائم گٹکا منشیات کے خلاف ضلع بھر میں پولیس کی کامیاب کارروائیوں کا سلسلہ جاری، دھابیجی میں پولیس مقابلہ ایک ڈکیت زخمی حالت میں گرفتار، پستول اور چھینی گئی موٹر سائیکل بھی برآمد۔ایس ایس پی ٹھٹھہ ڈاکٹر محمد عمران خان کی خصوصی ہدایات پر ضلع بھر میں پولیس کی کامیاب کارروائیوں کا سلسلہ تیزی سے جاری ہے۔ ایس ایچ اوانسپکٹر دھابیجی تھانہ غلام علی لاکھو، اے ایس آئی شکیل شورو معہ اسٹاف کے گشت پر تھے کہ خفیہ اطلاع ملی کہ کچھ افراد سالار گوٹھ مین روڈ پر ڈکیتی کی نیت سے کھڑے ہیں پولیس جیسے ہی وہاں پہنچی تو ڈکیتوں نے پولیس پر فائرنگ کردی، پولیس نے پوزیشن سنبھال کر جوابی فائرنگ شروع کردی جس کے نتیجے میں مجیب عرف سلطان شیخ زخمی حالت میں گرفتار کرلیا گیا جبکہ اس کے دیگر 4 ساتھی فرار ہوگئے جن کی گرفتاری کے لیے ناکہ بندی بھی کردی گئی ہے ۔گرفتار ملزم کے قبضے سے جرائم میں استعمال کی گئی پستول اور کراچی کورنگی سے چھینی گئی موٹر سائیکل بھی برآمد کرلی گئی ہے ، زخمی ڈکیت جس کا تعلق سکھر سے بتایا جاتا ہے اس کا کرمنل ریکارڈ منگوایا جارہا ہے ،ملزم کے خلاف دھابیجی تھانے میں الگ الگ مقدمات درج کرلیے گئے ہیں۔ دھابیجی پولیس کی کامیاب کارروائی پر دھابیجی کے رہائشیوں نے ایس ایس پی ٹھٹھہ ڈاکٹر محمد عمران خان ،ایس ایچ او و انسپکٹر دھابیجی تھانہ غلام علی لاکھو، اے ایس آئی شکیل شورو اور تمام پولیس اہلکاروں کو خراج تحسین پیش کیا ہے جبکہ ایس ایس پی ٹھٹھہ ڈاکٹر محمد عمران خان نے پولیس افسران اور اہلکاروں کو کامیاب کارروائی پر شاباش بھی دی۔
