اسلام آباد (اسٹاف رپورٹر) اسلام آباد کے سیکٹر جی 9 کے قریب سری نگر ہائی وے پر تیز رفتار ڈمپر نے کار کوٹکر مار دی ،جس کے نتیجے میں وفاقی ترقیاتی ادارہ(سی ڈی اے ) کے 2 ملازم جاں بحق اور 3 افراد زخمی ہوگئے۔ عینی شاہدین کے مطابق مہران کار ڈمپر ٹرک کے نیچے دھنس گئی،اس دوران آگ کے شعلے بھڑک اٹھے، جس سے گاڑی مکمل طور پر جل گئی۔ پولیس کا کہنا ہے کہ جاں بحق افراد سی ڈی اے کے شعبہ واٹر ٹینکر کے ملازم بتائے جاتے ہیں۔ حادثے میں ریت سے بھرا ڈمپر بھی جل گیا۔ گاڑیوں میں لگی آگ بجھانے کے لیے امدادی کارروائی کی گئی۔ دریں اثنا حادثے میں زخمی افراد کو اسپتال منتقل کردیا گیا ۔
