مظفرآباد(سید وزیر علی قادری)اوورزسیز وارئیرز نے ٹاس جیت کر پہلے اپنے بلے بازوں کو آزمانے کا فیصلہ کیا تو دوسری جانب کپتان شعیب ملک نے بولنگ کاآغاز کرتے ہوئے پہلی کامیابی حاصل کرلی۔ 22کے مجموعی اسکور پر حیدر علی کو ثمین گل نے صفر کا تحفہ دے دیا۔ ناصر نوازکی مہم جوئی پاورپلے کی آخری گیند پر ختم ہوئی جب ابراراحمد نے 19رنز بنانے والے کھبے اوپنر کو میدان سے باہر بھیج دیا۔عماد وسیم (12) بھی زیادہ دیر وکٹ پر نہ ٹھہر سکے لیکن کامران غلام اور اعظم خان نے اپنی ٹیم کو سنبھالتے ہوئے 145کا مجموعہ دلوادیا۔ کامران غلام نے 3 چوکوں اور2 چھکوں کی مدد سے 35 گیندوں پر 47 رنز کی اننگز کھیلی جبکہ اعظم خان نے 40گیندوں پر32رنز بنائے جس میں ایک چھکا شامل تھا۔ ان دونوں بیٹسمینوں کو پویلین بھیجنے والے سلمان ارشاد نے مجموعی طور پر 3 کھلاڑیوں کو آئوٹ کیا۔ہدف اتنا مشکل نہ تھا اور پھر میرپور رائلز کے اوپنرز مختار احمد اور شرجیل خان نے اس کو مزید آسان بنا دیا۔ پانچویں اوور میں دونوں جارح صفت اوپنرز نے اپنی ٹیم کے 50 رنز مکمل کروا دیے۔ مختار احمد نے 7 چوکے لگاتے ہوئے 40بالز پر 45 جبکہ شرجیل خان نے صرف 19گیندوں کا سامنا کرتے ہوئے 5 چوکوں اور ایک چھکے سمیت 35رنز کی اننگز کھیلی۔ محمد اخلاق جلد رن آئوٹ ہوگئے اور پھر موسی خان نے خوش دل شاہ (2) کو بھی بولڈ کردیا۔ کپتان شعیب ملک نے 25 گیندوں پر 2 چوکے اور3 چھکے لگاتے ہوئے 36 رنز کی باری کھیلی تو جیت سامنے نظر آرہی تھی۔ عماد بٹ نے 19 ویں کی پہلی گیند کو میدان سے باہر پھینکا تو میرپور رائلز کی جیت کا اعلان ہوچکا تھا۔ اوورسیز وارئیرز کیلئے موسی خان نے 3 وکٹیں اپنے نام کیں۔کشمیر سے تعلق رکھنے والے فاسٹ بولر سلمان ارشاد کو مین آف دی میچ کا ایوارڈ دیا گیا۔
