سعودی عرب نے غیرملکی زائرین کے لیے یکم محرم سے عمرہ کھولنے کا اعلان کر دیا۔
عرب میڈیا کے مطابق وزارت حج و عمرہ نے غیرملکی یا بیرون ملک سے زائرین کے لیے عمرہ کی اجازت دینے کا فیصلہ کیا ہے۔
یکم محرم الحرام 1443 ہجری سے غیرملکی عازمین کو عمرہ کی اجازت دی جائے گی۔
سعودی نائب وزیر حج و عمرہ ڈاکٹر عبدالفتاح مشاط نے اعلان کیا تھا کہ حج مکمل ہونے کے بعد 15 ذی الحجہ بروز اتوار سے عمرہ کھول دیا جائے گا۔
انہوں نے بتایا کہ 25 جولائی سے ابتدائی طور پر یومیہ بنیادوں پر 20 ہزار عمرہ اجازت نامے جاری کیے جائیں گے۔
نائب وزیر کا کہنا تھا کہ پہلے مرحلے میں اندرون ملک موجود شہریوں اور مقیم غیرملکیوں کو ہی عمرہ اجازت نامے جاری ہوں گے۔
ایک سوال کے جواب میں ڈاکٹر عبدالفتاح مشاط کا کہنا تھا کہ عمرہ اجازت ناموں کی تعداد میں بتدریج اضافہ کیا جائے گا اور یومیہ عمرہ زائرین کی تعداد 20 ہزار تک پہنچ جائے گی۔
