لاڑکانہ (نمائندہ جسارت) ایس ایس پی لاڑکانہ عمران قریشی کی ہدایات پر لاڑکانہ پولیس نے مختلف علاقوں میں جرائم پیشہ افراد کیخلاف کارروائیاں کرتے ہوئے اشتہاری، روپوش و مطلوب 5 ملزمان کو گرفتار کرلیا ہے۔ ولید پولیس نے اغواکے مقدمے میں مطلوب ملزم اشفاق بگھیو کو سیہڑ پولیس نے ضلع دادو کے تھانہ رادہن کے اشتہاری ملزم گہنور لاشاری کو، تعلقہ پولیس نے دوران چیکنگ کھیڈکر روڈ سے ملزم دیدار کلہوڑو کو دو کلو چرس سمیت جبکہ بقاپور پولیس نے دو مطلوب ملزمان زاہد بگہیو اور لیاقت بگہیو کو گرفتار کرلیا ہے۔ دوسری جانب ایس ایس پی لاڑکانہ نے بہترین کارکردگی پر متعلقہ پولیس افسران و جوانان کے لیے شاباشوں کے پیغامات جاری کیے ہیں۔ نوڈیرو کے قریب گاؤں سعدو دیرو میں مبینہ طور پر گھر والوں سے ناراض ہوکر کر دو شادی شدہ خواتین شائستہ اور زینت ابڑو نے گھر کے اندر زہر کھاکر خودکشی کی کوشش کی جنہیں ورثاء کی جانب سے بے ہوشی کی حالت میں چانڈکا اسپتال کے شعبہ حادثات منتقل کیا گیا جہاں انہیں طبی امداد دی گئی۔ ورثاء کے مطابق شائستہ اور زینت ابڑو نے گھر والوں سے ناراض ہوکر یہ اقدام اٹھایا تاہم ڈاکٹروں نے ان کی حالت خطرے سے باہر بتائی ہے۔
