لاہور (جسارت نیوز) پاکستان ہاکی فیڈریشن کے زیراہتمام پی ایچ ایف 4 ٹیمز ہاکی سیریز میں نیوی نے سوئی سدرن گیس کو ہرادیا،پاکستان جونیئرز اورواپڈا کے مابین میچ سنسنی خیزمقابلہ کے بعد ڈراء، پہلے میچ کے مہمان خصوصی سابق نیوی ہاکی کھلاڑی و کوچ محمد نعیم تھے جبکہ دوسرے میچ کے مہمان خصوصی واپڈا سپورٹس کنٹرول بورڈ کے منصور الحق بھٹہ تھے۔ جونیئر ورلڈ کپ اور جونیئر ایشیاء کپ میں شرکت کرنے والی قومی جونیئر ہاکی ٹیم کی تیاری کے سلسلے میں پاکستان ہاکی فیڈریشن کے زیراہتمام پی ایچ ایف 4 ٹیمز ہاکی سیریز کے پانچویں میچ میں پاکستان نیوی نے سوئی سدرن گیس کو 3-1 گول سے شکست دیدی جبکہ چھٹا میچ پاکستان جونیئرز اور پاکستان واپڈا کے مابین ایک سنسنی خیز مقابلہ کے بعد 1-1 گول سے ڈراء ہوگیا۔ نیشنل ہاکی اسٹیڈیم آسٹروٹرف گراؤنڈ نمبر 2 لاہور پر ڈبل لیگ بنیاد پر کھیلی جانے والی ہاکی سیریز میں پاکستان جونیئرز ہاکی ٹیم سمیت چار ٹیمیں شریک ہیں۔ جن میں پاکستان جونیئرز، پاکستان واپڈا، سوئی سدرن گیس اور پاکستان نیوی کی ٹیمیں شامل ہیں۔ اس ایونٹ کے ٹورنامنٹ ڈائریکٹر لیفٹننٹ کرنل رآصف نازکھوکھر تعینات کیے گئے ہیں جبکہ ایف آئی ایچ امپائرز منیجر راشد محمود بٹ بطور امپائرز منیجر اپنے فرائض منصبی سرانجام دے رہے ہیں۔
