نوابشاہ (سٹی رپورٹر) ساٹھ میل کے گاؤں علی مراد چانڈیو کے رہائشی معشوق علی مری، شیر عالم مری، مہراب مری، تاج مری، جعفر علی مری ودیگر نے نوابشاہ پریس کلب کے سامنے احتجاجی مظاہرہ کرتے ہوئے کہا کہ ہمارا بھائی علی مردان مری کراچی میں کام کرتا ہے جس کی شادی وہاں کے پنجابی برادری سے ہے، انہوں نے کہا کہ ہمارا کزن نور عالم مری بھی وہاں رہتا تھا جس نے ڈھائی ماہ قبل پنجابی برادری کی لڑکی سے شادی کی تھی، انہوں نے کہا کہ گزشتہ روز لڑکی کے بھائی نے کراچی اور نوابشاہ پولیس کے ہمراہ چھاپا مارکر لڑکی اور لڑکے کو گرفتار کیا جس پر ہمارا چچا صیفل اور کزن انور مری ہم پر آگ بگولہ ہوگئے کہ ہمارے نوجوان کو تم لوگوں نے گرفتار کرایا ہے، انہوں نے کہا کہ اب ساٹھ میل پولیس نے ہمارے بھائی سعید اللہ کو گرفتار کرکے لاپتا کردیا ہے۔ انہوں نے مطالبہ کیا کہ مذکورہ بااثر افراد کیخلاف کارروائی کرکے ہمارے ساتھ انصاف کیا جائے۔
