کراچی (نمائندہ جسارت) مرکزی سیکرٹری اطلاعات پیپلز پارٹی پارلیمنٹیرینز و رکن قومی اسمبلی شازیہ عطا مری نے کہا ہے کہ سلیکٹڈ وزیراعظم خیالی دنیا میں رہتے ہیں اور آٹا چینی گھی اور دالیں مہنگی کرنے والے سستی کاروں کا خواب بیچ رہے ہیں، آج غریب کے لیے موٹر سائیکل کا پیٹرول خریدنا پریشانی کا باعث ہے۔ ان خیالات کا اظہار انہوں نے ایک بیان میں کیا۔ شازیہ مری نے کہا کہ پی ٹی آئی حکومت شوگر اور دیگر امراض کی ادویات مہنگی کرکے نام نہاد صحت کارڈ کا ڈھنڈورا پیٹ رہی ہے۔ انہوں نے کہا کہ عمران خان عوام کو بتائیں صحت کارڈ سے کتنے غریبوں کا علاج ہوا ہے اور ایک کروڑ نوکریاں دینے والوں نے لاکھوں لوگوں کو بیروزگار کردیا ہے۔ شازیہ مری نے کہا کہ50 لاکھ گھر تعمیر کرنے کا خواب دکھا کر کروڑوں لوگوں کے گھر مسمارکردیے ہیں، اب جھوٹوں کی سرکار عوام کو مزید بیوقوف نہیں بنا سکتی۔
