اسلام آباد (صباح نیوز) پاکستان پیپلزپارٹی کے چیئرمین بلاول زرداری نے پاکستان مسلم لیگ (ن)کے صدر اور قومی اسمبلی میں قائد حزب اختلاف میاں محمد شہباز شریف سے ان کے چیمبر میں ملاقات کی اور ان کے تایا زاد بھائی اور ہم زلف محمد طارق شفیع کے انتقال پر تعزیت کی۔ پی پی پی کی جانب سے سوشل میڈیا پر جاری بیان کے مطابق بلاول زرداری نے محمد طارق شفیع کے بلندی درجات کے لیے فاتحہ خوانی اور لواحقین کے لیے صبر جمیل کی دعا بھی کی۔ بلاول کے ہمراہ یوسف رضا گیلانی اور شیری رحمن نے بھی اپوزیشن لیڈر شہباز شریف سے تعزیت کی۔ اس موقع پر سعد رفیق، خواجہ آصف و دیگر بھی موجود تھے۔
