احسان

حصہ اول

لفظِ احسان کا مادّہ حسن ہے، ہر خوبصورت اور مرغوب چیز کو حَسَن کہتے ہیں، علامہ اصفہانی نے مُستَحسنات کی کئی قسمیں بیان کی ہیں: ان کا تعلق عقل، نفسانی خواہشات، حواسِ ظاہری وباطنی سے ہے، جیسے علمی نکات اور لطائف، خوبصورت انسان، خوبصورت مناظر، خوش ذائقہ چیزیں اور دل آویز خوشبوئیں۔ ’’اَلْحَسَنَۃُ‘‘ کا معنی ہے: ’’ہر وہ نعمت جس کا اثر انسان اپنے نفس، بدن اور احوال میں محسوس کرسکے، اس کی ضد’’ اَلسَّیِّئَۃُ‘‘ ہے،قرآن مجید میں ہے: ’’اور اگر ان کو (مہمات میں کامیابی یا فصلوں کی زرخیزی کی صورت میں) کوئی خوشحالی پہنچے تو کہتے ہیں: یہ ہماری وجہ سے ہے اور اگر ان کو (مصائب، قحط، مہمّات میں ناکامی کی صورت میں) کوئی بدحالی پہنچے تو اس کو موسیٰ اور ان کے اصحاب کی نحوست قرار دیتے ہیں، (الاعراف: 131)‘‘، احادیث مبارکہ میں ہے:
(۱) ’’ایک شخص نے رسول اللہ ؐ سے پوچھا: ایمان کیا ہے، آپؐ نے فرمایا: جب تمہاری نیکی تمہیں اچھی لگے اور تمہاری برائی تمہیں بری لگے تو (جان لو کہ) تم مومن ہو، انہوں نے عرض کی: یارسول اللہ! گناہ کیا ہے، آپؐ نے فرمایا: جب کوئی بات تمہارے دل میں کھٹکے (یعنی اس پر اطمینان نہ ہو) تو اُسے چھوڑ دو، (مسند احمد)‘‘۔ (۲) ’’رسول اللہؐ نے فرمایا: (سوچے سمجھے بغیردوسروں کے پیروکار) نہ بنوکہ یہ کہو: اگر لوگوں نے اچھا سلوک کیا تو ہم بھی اچھا سلوک کریں گے، اگر انہوں نے ظلم کیا تو ہم بھی ظلم کریں گے، بلکہ (اس کے برعکس) اپنے آپ کو اس روِش پر مستقیم رکھوکہ اگر لوگ اچھا کریں تو تم بھی اچھا کرو اور اگر وہ برا کریں تو تم زیادتی نہ کرو، (ترمذی)‘‘، (۳) ’’نواس بن سمعان انصاری نے رسول اللہؐ سے نیکی اور گناہ کے بارے میں پوچھا: آپؐ نے فرمایا: نیکی اچھے اخلاق کا نام ہے اور گناہ وہ ہے جو تمہارے دل میں کھٹکے اور تمہیں یہ بات ناپسند ہو کہ لوگوں کو اس کا پتا چل جائے، (مسلم)‘‘۔
الغرض حَسَن وہ شے ہے جو عقل کے اعتبار سے پسندیدہ و مرغوب ہو اور اس کی عمدگی عقل کے معیار پر پوری اُترتی ہو یا قلبی رغبت اور چاہت کے اعتبار سے دل کو بھلی لگتی ہو یا حسیّ طور پر یعنی دیکھنے سننے اور پرکھنے کے اعتبار سے پر کشش ہو۔ حسن کا اطلاق عام لوگوں کے نزدیک اکثر ان چیزوں پر ہوتا ہے جن کا ادراک آنکھوں سے ہوتا ہے اور قرآن مجید میں حَسَنکا اطلاق اکثر ان چیزوں پر ہوا ہے جن کا ادراک بصیرت (عقل) سے ہوتا ہے، اللہ تعالیٰ کا ارشاد ہے: ’’جو لوگ غور سے اللہ کا کلام سنتے ہیں پھر اس پر عمدہ طریقے سے عمل کرتے ہیں، یہی وہ لوگ ہیں جن کو اللہ تعالیٰ نے ہدایت دی ہے، (الزمر: 18)‘‘، یعنی وہ اس طریقے سے اس حکم پر عمل کرتے ہیں کہ اس میں نَقص کا شائبہ بھی نہیں رہتا۔ حسن بن علی بیان کرتے ہیں: میں نے رسول اللہؐ سے یہ حدیث یاد رکھی ہے: ’’جس چیز میں شک ہو اس کو ترک کر کے اس چیز کو اختیار کرلو جس میں شک نہ ہو، بیشک صدق میں طمانیت ہے اور کذب میں شک ہے، (سنن ترمذی)‘‘۔
اِسی لفظِ حَسَن سے احسان ماخوذ ہے، یہ لغوی اعتبار سے ’’اَلْاِسَائَ ۃ ‘‘ (برائی) کی ضد ہے، امام اصفہانی نے لکھا: ’’احسان کا اطلاق دو معنوں پر کیا جاتا ہے: ’’کسی شخص پر انعام کرنا، کہا جاتا ہے: فلاں شخص پر انعام کیا یعنی کسی شخص کو کوئی نعمت دی، اللہ تعالیٰ فرماتا ہے: ’’نیکی کا بدلہ نیکی ہی ہے، (الرحمن: 60)‘‘، یعنی نعمت کا بدلہ نعمت سے دینا چاہیے۔ احسان کا دوسرا معنی ہے: ’’نیک کام کرنا‘‘، قرآن مجید میں ہے: ’’اگر تم نے کوئی نیک کام کیا ہے تو اپنے فائدہ کے لیے کیا ہے، (بنی اسرائیل: 7)‘‘۔
امام رازی لکھتے ہیں: ’’احسان قرآنِ کریم کے اُن کلمات میں سے ہے، جن کے معنی مفسرین نے سو تک بیان کیے ہیں، احسان کے ایک معنی ہیں: حسین صورت وسیرت میں تخلیق کرنا، اللہ تعالیٰ نے فرمایا: ’’اُس نے تمہاری صورت بنائی اور بہت حسین صورت بنائی، (مومن: 64)‘‘ اور فرمایا: ’’(اللہ) وہ ہے جس نے ہر چیز کو حسین بنایا، (السجدہ: 7)‘‘۔ اردو میں لفظِ احسان جن معنوں میں استعمال ہوتا ہے، اُن معنوں میں عربی میں لفظِ ’’مَنّ‘‘ اور ’’اِمْتِنَان‘‘ آتا ہے، ان کے معنی ہیں: بھلائی کرنا، احسان جتلانا۔ پس احسان کے معنی ہیں: ’’قلب یا اعضاء کے کسی فعل کو مرتبۂ کمال پر ادا کرنا، جس میں کوئی جھول، کوئی نَقص اور کوئی خامی باقی نہ رہے، اسے انگریزی میں Perfection سے تعبیر کرتے ہیں، ظاہر ہے کہ جب قلب یا اعضاء کا کوئی فعل یا احساس اس درجے میں ہوگا، تو اُس میں ہرجہت سے حُسن ہی حُسن ہوگا، جمال ہی جمال ہوگا، وہ نظروں میں بھی جچے گا، دل کو بھی لُبھائے گا اور جس کے لیے انجام دیا جارہا ہے، اُسے بھی بھلا معلوم ہوگا، اللہ تعالیٰ نے فرمایا: ’’اورکوئی مردو عورت جو ایمان پر قائم رہتے ہوئے نیک کام کرے گا، تو وہی لوگ جنت میں داخل ہوں گے اور اُن پر ذرّہ برابر بھی ظلم نہیں کیا جائے گا، (النسآء: 124)‘‘۔
ایک طویل حدیث میں ہے: ’’جبریل امین رسول اللہؐ کی بارگاہ میں حاضر ہوئے اور یکے بعد دیگرے اسلام، ایمان اور احسان کی بابت سوالات کیے، احسان کی بابت سوال کے جواب میں آپ ؐ نے فرمایا: احسان یہ ہے کہ تم اللہ کی عبادت (اس انہماک اور حضوریِ قلب کے ساتھ ) کرو کہ گویا تم اُسے دیکھ رہے ہو، پس اگر تم (اپنی کوتاہ نظری کے باعث) اُسے دیکھ نہیں پاتے، تو وہ یقینا تمہیں دیکھ رہا ہے، (مسلم)‘‘۔ احسان کا ایک درجہ اخلاص ہے، اللہ تعالیٰ نے فرمایا: ’’اور انہیں فقط اس بات کا حکم دیا گیا کہ وہ دین کو اللہ کے لیے خالص کرتے ہوئے یکسو ہوکراس کی عبادت کریں، (اَلْبَیِّنَہ: 5)‘‘۔
نیز اللہ تعالیٰ نے فرمایا: ’’(اے رسولِ مکرّم!) کہہ دیجیے: بے شک میری نماز، میری قربانی، میرا جینا اور مرنا اللہ رب العالمین کے لیے ہے، اُس کا کوئی شریک نہیں اور مجھے اسی بات کا حکم دیا گیا ہے اور میں پہلا مسلمان ہوں، (الانعام: 162)‘‘، یعنی آپ عالَمِ ارواح میں اول ہیں اور بعثت میں آخر ہیں۔ (۲) ’’اور جس نے احسان شعار ہوتے ہوئے اپنا رُخِ (بندگی) اللہ کے حضور جھکا دیا تو اُس نے مضبوط حلقے کو تھام لیا اور تمام کاموں کا انجام اللہ ہی کی طرف ہے، (لقمان: 22)‘‘۔ اگرچہ عام طور پر احسان کا معنی نیکی سے کیا جاتا ہے، جیسے: ’’اور اللہ نے حکم دیا ہے کہ اس کے سوا کسی کی عبادت نہ کرو اور والدین کے ساتھ نیک برتائو کرو، (بنی اسرائیل: 23)‘‘۔ لیکن پوری معنویت کو پیشِ نظر رکھا جائے تو اس سے بلند ترین درجے کی نیکی اور حُسنِ سلوک مراد ہے، اس کا ثبوت اس طویل حدیث سے ملتا ہے: ’’تین آدمیوں نے ایک غار میں پناہ لی اور شدید بارش کے سبب ایک چٹان نے سرک کر غار کو بند کردیا، انہوں نے ایک دوسرے سے کہا: اب اس مشکل سے نکلنے کی ایک ہی صورت ہے کہ ہم میں سے ہر ایک اللہ تعالیٰ کے حضور اپنے کسی بہترین عمل کا وسیلہ پیش کر کے ردِّبلا کی دعا کرے، پس اُن میں سے ایک نے کہا: ’’میں (دن بھر) مویشی چَرایا کرتا تھا، پھر (سرِشام) واپس آتا اور دودھ دوہ کر اپنے ماں باپ کے پاس لے آتا تاکہ وہ پیئیں، پھر (اُن کے بعد) میں اپنے بیوی بچوں اور گھر والوں کو پلاتا، ایک دن مجھے واپسی میں تاخیر ہوگئی، پس جب میں (دودھ لے کر) آیا تو والدین سوچکے تھے، سو میں نے انہیں جگانا پسند نہ کیا، بچے (خوراک کی طلب میں) میرے قدموں میں بِلک رہے تھے، (مگر) میں اسی حالت میں شب بھر کھڑا رہا یہاں تک کہ صبح ہوگئی (اور میں نے اپنے ماں باپ کو دودھ پلایا، اس نے گڑگڑا کر دعا کی:) اے اللہ! اگر تو جانتا ہے کہ میں نے (یہ مشقت صرف) تیری رضا کے لیے کی تھی، تو اس غار کو ہمارے لیے کھول دے تاکہ ہم آسمان کو دیکھ پائیں، سو غار کھول دیا گیا، (بخاری)‘‘۔ اسی طرح باقی دو ساتھیوں نے بھی اپنی اپنی اعلیٰ درجے کی نیکیوں کا وسیلہ پیش کیا تو اللہ تعالیٰ نے اُن کے لیے غار کے دہانے سے بھاری پتھر کو ہٹادیا اور انہیں مصیبت سے نجات ملی۔
اس کیفیت ِ احسان کو خشوع، خضوع اور خَشیت ِ الٰہی سے بھی تعبیر کیا گیا ہے، اللہ تعالیٰ نے فرمایا: ’’اور بے شک نماز ضرور بھاری ہے، سوائے اُن لوگوں کے کہ جن کے دل اللہ کے حضور جھکنے والے ہیں، انہیں اس بات کا یقین ہے کہ (ایک دن ضرور) وہ اپنے رب سے ملنے والے ہیں اور اُسی کی طرف لوٹنے والے ہیں، (البقرہ: 45-46)‘‘۔ رسول اللہؐ نے فرمایا: (۱) ’’اور بے شک اللہ نے تمہیں نماز کا حکم دیا ہے، پس جب تم نماز پڑھو تو ادھر اُدھر توجہ نہ کرو، کیونکہ اللہ نماز میں اپنی توجہ بندے کی جانب مبذول فرماتا ہے تاوقتیکہ وہ (خود) اپنی توجہ اس سے ہٹانہ لے، (ترمذی)‘‘، (۲)’’سیدنا ابوذر بیان کرتے ہیں: رسول اللہؐ نے فرمایا: جب تک بندہ نماز میں ہے، اللہ تعالیٰ برابر اپنے بندے کی جانب متوجہ رہتا ہے تاوقتیکہ وہ خود اپنی توجہ ہٹالیتا ہے، پس جب بندہ (اللہ سے) توجہ ہٹا لیتا ہے، تو اللہ تعالیٰ بھی اُس سے رُخ پھیر لیتا ہے، (ابودائود)‘‘، (۳) آپؐ نے فرمایا: ’’جب مسلمان پر فرض نماز کا وقت آجائے تو جو بھی مسلمان اچھے طریقے سے وضو کرتا ہے،
باقی صفحہ7نمبر1
نماز اور رکوع میں خشوع کرتا ہے تو یہ نماز اُس کے گزشتہ گناہوں کا کفارہ بن جاتی ہے، جب تک کہ کبیرہ گناہ نہ کرے اور (اللہ کی یہ نوازش) عمر بھر جاری رہتی ہے، (مسلم)‘‘۔ (۴) نبیؐ نے فرمایا: ’’نماز اس حضوری کے ساتھ ادا کرو کہ (گویا) یہ تمہاری زندگی کی آخری نماز ہے، کیونکہ اگر تم (اپنی کوتاہ نظری کے باعث) اُسے نہیں دیکھ پاتے تو وہ یقینا تمہیں دیکھ رہا ہے، (الترغیب والترہیب)‘‘، (۵) ’’سعید بن مسیّب نے ایک شخص کو دیکھا کہ وہ (نماز میں) اپنی ڈاڑھی سے کھیل رہا ہے، تو انہوں نے فرمایا: اگر اس کا دل اللہ کے حضور جھکا ہوتا تو اس کے اعضاء میں بھی حضوریِ بارگاہِ رب العالمین کے اثرات ہوتے، (مصنَّف ابن ابی شیبہ)‘‘، (۶) نبی ؐ نے فرمایا: لوگوں کو کیا ہوگیا ہے کہ وہ اپنی نمازوں میں آسمان کی طرف دیکھ رہے ہوتے ہیں، پھر آپ نے اس پر شدت فرمائی یہاں تک کہ فرمایا: لوگ نمازوں میں بے توجہی سے باز آجائیں، ورنہ اُن کی نگاہوں کو اُچک لیا جائے گا، (بخاری)‘‘۔
(جاری ہے)