کراچی(اسٹاف رپورٹر)گھوٹکی ٹرین حادثے میں زخمی ہونے والی 14 سالہ کائنات کو کراچی ریلوے کے حسن ہسپتال سے ڈویژنل سپرنٹنڈنٹ کراچی ریلوے محمد حنیف گل اور کمانڈنٹ پی این ایس شفا سرجن کموڈورعابد حسین شاہ کی زیر نگرانی پی این ایس شفا منتقل کردیا گیا۔ ڈویژنل سپرنٹنڈنٹ پاکستان ریلوے کراچی محمد حنیف گل نے جمعہ کی شام حسن ہسپتال میں داخل کائنات کی عیادت کی اور ان کے ورثا کو کراچی ریلوے کی طرف سے بھرپور تعاون کا یقین دلایا۔اس موقع پر ڈی ایس کراچی ریلوے نے کہا کہ ابتدائی طور پر کائنات کو پی این ایس شفا منتقل کیا جارہا ہے لیکن ضرورت پڑنے پر انہیں کسی دوسری ہسپتال بھی منتقل کیا جاسکتا ہے۔ انہوں نے کہا کہ دکھ اور شدید غم کی اس گھڑی میں محکمہ ریلوے معصوم کائنات کے ساتھ کھڑا ہے اور اس کے بہترین علاج میں کوئی کمی نہیں برتی جائیگی۔ڈویژنل سپرنٹنڈنٹ کراچی ریلوے نے حسن ہسپتال کی انتظامیہ کو سختی سے ہدایات دی ہیں کہ وہ صبح شام اس معصوم بچی کی صحت اور طبیعت میں بہتری کو مانیٹر کرے اور ان کو بروقت اطلاع دی جائے۔
