کراچی (سید وزیر علی قادری)کراچی کنگز نے اپنے آخری گروپ میچ میں کوئٹہ گلیڈی ایٹرز کو 14 رنز سے شکست دے کر پی ایس ایل 6 کے پلے آف مرحلے میں رسائی حاصل کرلی ہے۔13 گیندوں پر 45 رنز کی برق رفتار اننگز کھیلنے پر دانش عزیز کو پلیئر آف دی میچ قرار دیا گیا۔ 177 رنز کے تعاقب میں کوئٹہ گلیڈی ایٹرز کی ٹیم مقررہ 20 اوورز میں 6 وکٹوں کے نقصان پر 162 رنز ہی بناسکی۔ کپتان سرفراز احمد کے علاوہ کوئٹہ گلیڈی ایٹرز کا کوئی بھی بیٹسمین زیادہ دیر کریز پر نہ ٹھیر سکا ۔ 33 گیند پر 51 رنز کی ناقابل شکست اننگز کھیلنے والے سرفراز احمد بھی ٹیم کو فتح دلانے میں ناکام رہے۔ اس سے قبل کراچی کنگز 20 اوورز میں 7 وکٹوں کے نقصان پر 176 رنز بنائے۔ شرجیل خان نے 4 چھکوں اور 3 چوکوں کی بدولت 45 ‘ بابر اعظم نے 23 ‘ مارٹن گپٹل 5، نجیب اللہ زاردان 12 اور عماد وسیم نے3 رنز بنائے تاہم اننگز کے آخری لمحات میں دانش عزیز کی 13 گیندوں پر 5 چھکوں اور 2 چوکوں کی مدد سے 45 رنز کی دھواں دھار اننگز نے کراچی کنگز کا مجموعہ 170 تک پہنچا دیا۔اس دوران چیڈوک والٹن نے ان کا بھرپور ساتھ دیا وہ 34 رنز بنا کر ناٹ آؤٹ رہے، محمد الیاس نے ایک رنبنایا۔آرش علی خان نے 28 رنز کے عوض 4 جبکہ خرم شہزاد اور عبدالناصر نے ایک ایک کھلاڑی کو آؤٹ کیا۔
