کوئٹہ (نمائندہ جسارت) بلوچستان کے علاقے خضدار میں زائرین کی بس الٹنے سے 25 زائرین جاں بحق 40 زخمی ہو گئے۔ تفصیلات کے مطابق جمعے کی علی الصبح سندھ کے ضلع دادو سے تعلق رکھنے والے زائرین وڈھ کاکا ہیر میں پیر سائیں عبدالقادر نقشبندی کے عرس مبارک کی تقریب میں شرکت کے بعد واپس دادو جا رہے تھے کہ بھلونک کے مقام پر موڑ کاٹتے ہوئے بس ڈرائیور سے بے قابو ہو کر کھائی میں جا گری‘ جس کے نتیجے میں25 مسافر ہلاک جبکہ40 زخمی ہو گئے‘ بعض کی حالت تشویشناک ہے۔ حا دثے کی اطلاع ملتے ہی مقامی انتظامیہ نے جائے وقوع پر پہنچ کر نعشوں اور زخمیوں کو گورنمنٹ ٹیچنگ اسپتال خضدار پہنچایا‘ نعشوں کو ضروری کارروائی کے بعد انہیں ان کے آبائی علاقے کو روانہ کردیا گیا۔
