لاڑکانہ (نمائندہ جسارت) رتو ڈیرو تحصیل کے گاؤں محمد تقی کھٹیان میں بچوں کے معاملے پر جھگڑا، فائرنگ کے نتیجے میں 6 بچوں کا باپ عمران کھٹیان زخمی، دوران علاج زخموں کی تاب نہ لاتے ہوئے دم توڑ گیا۔ ورثاء کے مطابق بچوں میں معمولی بات پر جھگڑے کے بعد چپقلش ہوئی جس پر بااثر افراد فائرنگ کرکے عمران کھٹیان کو قتل کرنے کے بعد فرار ہوگئے۔ انہوں نے مطالبہ کیا کہ قتل میں ملوث ملزمان کو گرفتار کرکے انصاف فراہم کیا جائے۔ دوسری جانب مقتول کی لاش ضروری کارروائی کے بعد ورثاء کے حوالے کردی گئی۔ لاڑکانہ کے قریب خیرپور جوسو ہال باغ چوک پر تیز رفتار کار اور موٹر سائیکل میں ٹکر کے نتیجے میں دو افراد شدید زخمی ہوئے، جنہیں لوگوں نے زخمی حالت میں چانڈکا اسپتال کے شعبہ حادثات منتقل کیا، جہاں انہیں طبی امداد دی گئی۔ ڈاکٹروں کے مطابق علاقہ مکینوں نے دو زخمیوں کو تشویش ناک حالت میں اسپتال منتقل کیا، جن کی شناخت نہ ہوسکی۔
