لاڑکانہ (نمائندہ جسارت) لاڑکانہ پولیس نے جرائم پیشہ افراد کیخلاف کارروائیاں کرتے ہوئے ڈکیتی، لوٹ مار، ناجائز اسلحہ، پولیس مقابلوں، منشیات اور چوریوں جیسے سنگین نوعیت کے مقدمات میں ملوث دو ملزمان کو گرفتار کرکے اسلحہ اور منشیات برآمد کرلی ہے۔ باڈہ پولیس نے درگاہ چھٹل شاہ کے قریب کارروائی کرتے ہوئے ڈکیتیاں، لوٹ مار، ناجائز اسلحہ، پولیس مقابلوں اور منشیات جیسے 15 سے زائد سنگین نوعیت کے مقدمات میں ملوث ملزم عبداللہ عرف جن جتوئی کو دو کلو ایک پاؤ چرس سمیت، ایئرپورٹ پولیس نے دادو کینال کے قریب کارروائی کرتے ہوئے ڈکیتیاں، چوریاں، منشیات اور پولیس مقابلوں جیسے 7 سے زائد سنگین نوعیت کے مقدمات میں ملوث ملزم سجاد عرف سجو جتوئی کو دو کلو چرس سمیت گرفتار کرلیا ہے۔ پولیس کے مطابق گرفتار ملزمان کیخلاف ایسے مقدمات درج کرکے تفتیش شروع کردی گئی ہے۔
