اسلام آباد: وزیر اعظم عمران خان نے صوبہ سندھ میں بڑھتے ہوئے جرائم پر نے نوٹس لیتے ہوئے وفاقی وزیر داخلہ شیخ رشید احمد کو سندھ کے دورے کی ہدایت کر دی ہے۔
وفاقی وزیر اطلاعات فواد چوہدری نےٹوئٹ کرتے ہوئے بتایا کہ وزیر اعظم عمران خان نے گورنر سندھ عمران اسماعیل اور وزیر پلاننگ اسد عمر سے سندھ کی صورت حال پر تفصیلی گفتگو کی، گورنر سندھ اور وفاقی وزیر منصوبہ بندی نے وزیر اعظم عمران خان کو سندھ میں انتظامی طور پر ابتری، بالخصوص امن و امان اور بڑھتے ہوئے جرائم پر اپنی شدید تشویش سے آگاہ کیا۔
وزیر اعظم نے ان معلومات پر نوٹس لیتے ہوئے وزیر داخلہ شیخ رشید کو ہدایت کی کہ وہ سندھ کا دورہ کریں اور قانون نافذ کرنے والے اداروں کے ساتھ مل کر اس صورت حال پر حکمت عملی طے کریں۔
فواد چوہدری کے مطابق وزیر داخلہ شیخ رشید اس دورے کے بعد اپنی رپورٹ وزیر اعظم کو پیش کریں گے، وزیر اعظم نے سندھ میں رینجرز کو متحرک کرنے کی بھی ہدایت کردی ہے، وزیر داخلہ کراچی میں رینجرز کو متحرک کرنے کا حکم دیں گے، گورنر اور اسد عمر نے کراچی کے خراب حالات پر بھی وزیر اعظم کو شکایت کی تھی۔
