شیخوپورہ(صباح نیوز)سابق وزیراعظم میاں محمدنواز شریف کی شیخوپورہ کے قصبے فیروز وٹواں میں اراضی کی نیلامی کا عمل مکمل کرلیاگیا۔چودھری محمد بوٹا نامی شخص نے ایک کروڑ ایک لاکھ روپے فی ایکڑکے حساب سے سب سے زیادہ بولی دی، بولی کے موقع پر اراضی کے 6 دعویدار بھی سامنے آگئے۔نواز شریف کی اراضی کی نیلامی کا عمل شیخو پوہ میونسپل دفتر میں گزشتہ روز صبح 10 بجے شروع ہوا جو ساڑھے 3 بجے سہ پہر تک جاری رہا۔اراضی کی خریداری کے لیے3امیدوار سامنے آئے ، سب سے زیادہ بولی ایک کروڑ ایک لاکھ روپے فی ایکڑ کے حساب سے محمد بوٹا نامی شخص نے لگائی۔اس بولی کے مطابق زمین کی قیمت 11کروڑ روپے سے زاید بنتی ہے ، نیلامی میں حصہ لینے والوں کو 10 لاکھ زر ضمانت جمع کرانے کی ہدایت کی گئی۔نواز شریف کی جائداد کی نیلامی کا حکم 22 اپریل کو احتساب عدالت اسلام آباد نے دیا تھا، نیلامی کی فی ایکڑا بتدائی قیمت 70 لاکھ روپے مقرر کی گئی تھی۔انچارج بولی اجمل فاروق کا کہنا ہے کہ نواز شریف کے نام 88 کنال 4مرلے جائداد کی نیلامی کا عمل مکمل کرلیا گیا، بولی کی قیمت کے بارے میں عدالت کو آگاہ کر دیا جائے گا۔نیلامی کے موقع پر اسی اراضی کے 6 دعویدار بھی سامنے آگئے جنہیں عدالت سے رجوع کرنے کا کہہ دیا گیا۔
