ہیلو ہیلو کرنے سے مہنگائی کے سونامی کی تباہی ختم نہیں ہوسکتی ،بلاول

کراچی (اسٹاف رپورٹر) پاکستان پیپلز پارٹی کے چیئرمین بلاول زرداری نے کہا ہے کہ فون پر ہیلو ہیلو کرنے کے ڈرامے سے ملک کے گلی کوچوں میں مہنگائی کے سونامی کی تباہی ختم نہیں ہوسکتی‘سیاسی انتقام کے لیے منی لانڈرنگ اور کرپشن کا جھوٹا واویلا کرکے عمران خان نے ملک کو بلیک لسٹ ہونے کے دہانے پر پہنچا دیا۔ اپنے بیان میں انہوں نے کہا کہ کرپشن کے خلاف عمران خان کی مہم دراصل قوم کے ساتھ ہونے والا ایک ایسا فراڈ ہے جس نے ملک کے روشن مستقبل پر بھی سوالیہ نشان لگادیا ہے‘ مافیا کے سرپرست عمران خان کے احتساب کے جھوٹے نعرے کا پول کھل چکا‘ عوام
اب اس جھانسے میں نہیں آئیں گے‘ غیر ملکی سرمایہ دار کیسے بھروسہ کریں گے کہ عمران خان خود پاکستان کو کرپشن کا گڑھ ثابت کرتے رہے ہیں‘ یومیہ 12 ارب روپے کی کرپشن کا الزام لگا کر اقتدار میں آنے والوں نے اپنی حکومت میں مبینہ یومیہ کرپشن کا کتنا پیسہ قومی خزانے میں جمع کرایا؟ چیئرمین پیپلز پارٹی نے کہا کہ آج اگر عوام مہنگائی کی وجہ سے بنیادی ضروریات سے بھی محروم ہو رہے ہیں تو اس کے ذمے دار صرف عمران خان ہیں‘ یہ تبدیلی نہیں یہ تباہی ہے ۔ بلاول زرداری نے کہا کہ پیپلز پارٹی مسلسل نیشنل ایکشن پلان پر عمل درآمد کا مطالبہ کرتی رہی مگر حکومت نے ایسا نہ کیا اور معیشت پر بھی اس کے منفی اثرات پڑے‘ شرمندگی کا مقام ہے کہ کمبوڈیا، گھانا اور زمبابوے جیسے پسماندہ ممالک کے ہمراہ پاکستان بھی ایف اے ٹی ایف کی گرے لسٹ سے نہ نکل سکا‘ پیپلز پارٹی کی وفاقی حکومت نے ملک کو یورپی یونین سے جی ایس پی پلس کا درجہ دلوایا اور اسے بھی عمران خان نے دائو پر لگا دیا۔ پیپلز پارٹی کے چیئرمین بلاول زرداری نے کہا ہے کہ 12 مئی ملکی تاریخ کا بدترین تاریک واقعہ ہے جسے بھولنا مشکل ہے‘ 12 مئی کے تمام شہدا ء کو سلام پیش کرتے ہیں۔ اپنے پیغام میں انہوںنے کہا کہ اس سانحے کے متاثرہ خاندانوں سے ایک بار پھر تعزیت کا اظہار کرتا ہوں۔