اسلام آباد(اے پی پی) وزیر خارجہ مخدوم شاہ محمود قریشی سے امریکن پاکستانی ایڈووکیسی گروپ نیویارک کے صدر علی راشد نے جمعرات کو وزارت خارجہ میں ملاقات کی۔ بات چیت کے دوران کورونا عالمی وبائی چیلنج،مسئلہ کشمیر سمیت باہمی دلچسپی کے امور پر تبادلہ خیال ہوا۔ صدر امریکن پاکستانی ایڈووکیسی گروپ علی راشد نے وزیر خارجہ کو گروپ کی امریکا میں مقیم پاکستانی کمیونٹی کے لیے خدمات اور مسئلہ کشمیر کو عالمی سطح پر اجاگر کرنے کے حوالے سے کی گئی کوششوں سے آگاہ کیا۔ وزیر خارجہ نے نیویارک اسٹیٹ اسمبلی کی طرف سے 5فروری کو بطور ’’کشمیر ڈے‘‘ منانے کی قرارداد کی منظوری کے لیے امریکن پاکستانی ایڈووکیسی گروپ کی کاوشوں کو سراہا اور کورونا وبا کے دوران امریکا میں مقیم پاکستانی کمیونٹی کو فراہم کی گئی خدمات کی تعریف کی ۔
