افغان حکام کا کارروائیوں میں 6 طالبان کی ہلاکت کا دعویٰ

کابل (اے پی پی) افغانستان کی وزارت دفاع کا 2 مختلف واقعات میں 6 طالبان کی ہلاکت کا دعویٰ۔ چینی ذرائع ابلاغ کے مطابق افغان وزارت دفاع کے حکام نے کہا کہ ناوا ضلع میں افغان فضائیہ کی فضائی کارروائی کے دوران جنوبی صوبہ ہلمند میں عسکریت پسندوں کے ٹھکانوں کو نشانہ بنانے کے بعددیسی ساختہ دھماکا خیز مواد (آئی ای ڈی) بنانے والے 5 طالبان مارے گئے جبکہ 66 آئی ای ڈی ، بھاری مقدار میں اسلحہ، گولہ بارود اور ایک گاڑی تباہ
کر دی گئی ہے۔ افغان وزارت دفاع نے ایک بیان میں اس واقعے کی تصدیق کر دی ہے جبکہ عسکریت پسند گروپوں کی جانب سے کسی قسم کی تصدیق یا تردید کی کوئی اطلاع موصول نہیں ہوئی ہے۔ دوسری جانب افغانستان کی مشرقی صوبہ ننگرہار میں افغان نیشنل ڈائریکٹوریٹ آف سیکورٹی کی اسپیشل فورسز نے صوبائی دارالحکومت جلال آباد شہر کے پولیس ڈسٹرکٹ 8میں ایک کارروائی کے دوران اسلامک اسٹیٹ (آئی ایس) کے حامی بم بنانے والے ماہر عسکریت پسند کوپولیس نے گولی مار کر ہلاک کردیا۔ ملک کی قومی انٹلیجنس ایجنسی ، این ڈی ایس نے اتوار کو جاری بیان میں عسکریت پسند کی ہلاکت کی تصدیق کی۔