چمن،خیر پور(نمائند ہ جسارت،خبر ایجنسیاں) چمن، خیر پور میں لیویز ہیڈکوارٹرز کے قریب دھماکا،کریکر حملہ،3 شہید،18 زخمی۔تفصیلات کے مطابق صوبہ بلوچستان کے سرحدی علاقے چمن میں تاج روڈ پر لیویز ہیڈکوارٹر کے سامنے دھماکے میں 3 افراد جاں بحق ہوگئے۔پولیس کے مطابق دھماکا پولیس موبائل کے قریب ہوا اور دھماکا خیز مواد موٹر سائیکل میں نصب کیا گیا تھا۔پولیس نے بتایا کہ دھماکے کے نتیجے میں 3 فراد جاں بحق 14 زخمی ہوگئے جبکہ زخمیوں کو ڈسٹرکٹ ہیڈکوارٹر اسپتال منتقل کیا گیا ہے جہاں 5 کی حالت تشویشناک ہے۔پولیس کے مطابق دھماکے کے باعث متعدد دکانوں کو بھی نقصان پہنچا ہے۔وزیر داخلہ بلوچستان میر ضیااللہ لانگو نے دھماکے کی مذمت کرتے ہوئے جانی نقصان پر دکھ اور افسوس کا اظہار کیا۔انہوں نے انتظامیہ سے دھماکے کی رپورٹ طلب کرتے ہوئے کہا کہ افسوسناک واقعے میں ملوث ملزمان کسی رعایت کے مستحق نہیں جبکہ جاں بحق افراد کے لواحقین کو ہر قیمت پر انصاف فراہم کیا جائے گا۔دوسری جانبسندھ کے شہرخیرپور میں کریکر حملے میں 2 رینجرز اہلکاروں سمیت 4 افراد زخمی ہو گئے ۔پولیس کے مطابق خیرپور کے مال روڈ پر رینجرزکی گاڑی کے قریب کریکرحملہ کیا گیا جس کے نتیجے میں 2 رینجرز اہلکار اور 2 شہری بھی زخمی ہوئے جنہیں فوری طبی امداد کے لیے اسپتال منتقل کردیا گیا۔میڈیکل سپرنٹنڈنٹ سول اسپتال کے مطابق چاروں زخمیوں کی حالت خطرے سے باہر ہے اور انہیں جلد اسپتال سے فارغ کردیا جائے گا۔دوسری جانب پولیس کا کہنا ہے کہ واقعے کے بعد علاقے کی سکیورٹی بڑھادی گئی ہے اور ملزمان کی تلاش کے لیے سرچ آپریشن جاری ہے۔
