کوئٹہ/ اسلام آباد/ کراچی (آن لائن) جمعیت علما اسلام پاکستان کے سینئر رہنما اور سابق سینیٹر حافظ حسین احمد نے کہا ہے کہ سینٹ انتخابات میں پی ڈی ایم کو نہ خدا ہی ملا نہ وصال صنم نہ ادھر کے ہوئے نہ ادھر کے رہے، زرداری نے ایک ایک کرکے مسلم لیگ(ن) کے پرانے حساب چکا دیے ہیں اور سب سے زیادہ نقصان کا سامنا مولانا فضل الرحمن کو کرنا پڑا ہے۔اپنی رہائشگاہ پر میڈیا سے گفتگو کرتے ہوئے سینیٹ انتخابات سے متعلق انہوں نے کہا کہ طاقتور قوتوں نے زرداری کے توسط سے پی ڈی ایم کا مخالفانہ ٹریک ہی تبدیل کردیا، 20 ستمبر 2020ءکے اجلاس میں پی ڈی ایم کی قیادت نے سینیٹ کے الیکٹورل کالج کو ختم کرنے، قومی و صوبائی اسمبلیوں سے استعفا دینے اور ضمنی الیکشن میں حصہ نہ لینے کا حتمی فیصلہ کیا تھا لیکن زرداری نے کسی کے اشارے پر اسی قومی اسمبلی سے پی ڈی ایم کو سینیٹ کا الیکشن لڑوایا اور آج اس الیکٹورل کالج جس کو وہ ختم کرنا چاہتے تھے اس میں چیئرمین اور ڈپٹی چیئرمین کا الیکشن لڑا لیکن مکافات عمل ہے کہ قومی اسمبلی میں جو کچھ پی ڈی ایم نے کیا وہی کچھ حکومت نے سینیٹ میں ان کے ساتھ کیا، وہاں بھی 7 کا ہندسہ شکست کا باعث بنا اور یہاں بھی 7 ووٹ مسترد ہوئے، 7 کے ہندسے نے ساتھ رہنے والوں کے ساتھ ہی ہاتھ کردیا۔ ان کا کہنا تھا کہ جے یو آئی کو بند گلی میں پہنچانے والے مولانا فضل الرحمن کو سوچنا چاہیے کہ انہوں نے کیا کھویا اور کیا پایا؟ ڈھائی سال سے جے یو آئی کو 2 بڑی جماعتیں جس طرح ٹشو پیپر کے طور پر استعمال کرتی رہیں آج اس کا انجام سامنے آچکا ہے۔ پیپلز پارٹی اب بھی 26 مارچ کے مجوزہ رینٹل مارچ سے جان چھڑانے کی کوشش کرے گی اس لیے جے یو آئی کے کارکنان محتاط رہیں، اگر نکلنا ہو تو 29 مارچ کو نکلیں تاکہ 2 بڑی جماعتوں کی مارچ سے متعلق سنجیدگی کا پتا چل سکے۔
