سانگھڑ (نمائندہ جسارت) جھول تھانے کی حدود محمد شاہ بخاری کے مزار کے قریب سے گولیاں لگی لاش برآمد، پولیس نے لاش کو سول اسپتال سانگھڑ منتقل کیا، مقتول کی شناخت سلام مری ولد ابرہیم مری کے نام سے ہوئی۔ ڈاکٹر کے مطابق قریب سے سر میں تین گولیاں ماری گئی ہیں جو کہ موت کا سبب بنیں۔ اس موقع پر مقتول کے بھائی آصف علی مری اور رئیس عبداللطیف مری نے کہا کہ رات گئے نامعلوم افراد مقتول کو گھر سے بلا کر لے گئے، کچھ دیر کے بعد فائرنگ کی آواز بھی سنی گئی، عزیز و اقارب نے رات علاقے میں ڈھونڈا مگر کچھ پتا نہیں چلا، مزار محمد شاہ بخاری کے پاس سے لاش ملی۔ رئیس عبداللطیف مری کا مزید کہنا تھا کہ قتل کی واردات چھپ نہیں سکتی، جلد ہی والدین سے مل کر ملزمان کے نام ظاہر کیے جائیں گے۔ پولیس کا کہنا ہے کہ ورثاء کی مدعیت میں مقدمہ درج کیا جائے گا جبکہ تفتیش کا عمل شروع کردیا گیا ہے۔
