اسرائیل کی حکمراں جماعت لیکود کے وزراء نے کہا ہے کہ آنے والی امریکی انتظامیہ کو ایران کو مطمئن نہیں کرنا چاہئے اور متنبہ کیا ہے کہ اگر جوبائیڈن نے ایران کے ساتھ کوئی جوہری معاہدہ کیا تو اسرائیل ایران کے جوہری پروگرامز پر حملہ کردے گا۔
اسرائیلی نیوز ایجنسی کے مطابق وزیر اعظم بنیامین نیتن یاہو کا حلیف سمجھے جانے والے ایک اسرائیلی عہدیدار تیجا حنجیبی نے اپنے سخت بیان میں تہران کو دھمکی دی ہے اور اُس کے جوہری پروگرامز کو نشانہ بنانے کی بات کی ہے۔
انہوں نے یہ بھی کہا کہ یہودی ریاست شام میں ایرانی افواج کی موجودگی یا اس کے جوہری ہتھیاروں کی ترقی کو برداشت نہیں کرے گی۔ لیکود نے دھمکی دی ہے کہ اگر امریکہ ایران کے ساتھ جوہری معاہدے میں دوبارہ شامل ہوا تو اسرائیل ایران کے جوہری پروگرام پر حملہ کردے گا۔
واضح رہے کہ جوبائیڈن ایران کے ساتھ جوہری معاہدہ کرنا چاہ رہے ہیں۔ دوسری جانب اسرائیلی وزیر اعظم نیتن یاہو کی جانب سے ابھی تک حملے کے حوالے سے کوئی واضح موقف سامنے نہیں آیا ہے۔
