کوئٹہ(نمائندہ جسارت )وزیراعلیٰ بلوچستان جام کمال خان نے سریاب روڈ کوئٹہ کی تعمیر کے منصوبے پر عمل درآمد میں غیر ضروری تاخیر پر سابق کمشنر کوئٹہ کے خلاف انکوائری کا حکم دے دیا ہے۔ وزیراعلیٰ نے کوئٹہ ترقیاتی پیکیج اور شہر کی خوبصورتی سے متعلق منصوبے پر پیش رفت پر دی جانے والی بریفنگ کے دوران انکوائری کا حکم جاری کیا۔ انہوں نے اوستہ محمد روڈ کی تعمیر کو دس حصوں میں تقسیم کرنے پر بھی سخت برہمی کا اظہار کرتے ہوئے اس کی انکوائری کا حکم دیا ہے۔ دونوں انکوائریاں وزیراعلیٰ معائنہ ٹیم کرے گی۔ وزیراعلیٰ نے کوئٹہ ترقیاتی پیکیج میں شامل سڑکوں کی تعمیر کے منصوبوں پر عملدرآمد میں تاخیر پر ناپسندیدگی کا اظہار کرتے ہوئے کہا کہ منصوبوں میں غیر ضروری تاخیر، حکومت کے فنڈز اور وقت کا ضیاع کسی صورت قابل قبول نہیں۔ وزیراعلیٰ نے کہا کہ کوئٹہ کے عوام کو خطیر تخمینہ کے کوئٹہ پیکیج سے شہر کی بہتری کے حوالے سے توقعات وابستہ ہیں۔ اور یہ منصوبہ شہر کی خوبصورتی اور شہری سہولیات کی فراہمی کے حوالے سے اہمیت کا حامل ہے۔ وزیراعلیٰ نے ہدایات دیتے ہوئے کہا کہ کوئٹہ ترقیاتی پیکیج کے منصوبوں پر عملدرآمد کے لیے محکمہ سی اینڈ ڈبلیو، منصوبہ بندی و ترقیات اور پروجیکٹ ڈائریکٹر مؤثر میکنزم تیار کرکے مائیکرو لیول مینجمنٹ کے لیے اقدامات اٹھائیں۔ وزیراعلیٰ نے خاص طور سے اے سی ایس منصوبہ بندی و ترقیات کو ہدایت کی کہ کوئٹہ پیکیج کا جائزہ لینے کیلیے تمام اسٹک ہولڈرز سے مشاورت کرکے پروجیکٹ کے لیے انڈیپنڈنٹ پروجیکٹ ڈائریکٹرز کی تقرری کے لیے میکنزم وضح کرنے کے لیے آئندہ اجلاس میں سفارشات پیش کی جائیں۔ وزیراعلیٰ نے کہا کہ کوئٹہ شہر کے لیے ایسے منصوبے بار بار نہیں آئیں گے یہ وہ منصوبے ہیں جو کوئٹہ شہر کی ترقی کے لیے اہم سنگ میل ثابت ہوںگے۔ ترقیاتی منصوبے بروقت مکمل ہوں گے تو ترقی ہو گی اور عوام خوشحال ہو گی۔
