ٹھٹھہ (نمائندہ جسارت) دھابیجی کے قریب کمرے میں سوئے ہوئے دو مزدور دم گھٹنے سے جاں بحق، لاشوں کو رورل ہیلتھ سینٹر گھارو پہنچایا گیا۔ دھابیجی کے ایک فارم ہائوس کے قریب پولٹری فارم پر مزدوری کرنے والے طارق اور صابر تھکاوٹ کے باعث سردی سے بچنے کے لیے کمرے میں انگیٹھی جلاکر سوگئے جس کی وجہ سے دونوں مزدور دم گھٹنے کے سبب جاں بحق ہوگئے۔ چوکیدار کے مطابق جب دونوں کو جگانے گیا تو دروازہ نہیں کھلا، پولیس نے آکر دروازہ توڑا تو اندر انگیٹھی کی گیس بھری ہوئی تھی۔ لاشیں پولیس نے تحویل میں لے کر رورل ہیلتھ سینٹر گھارو پہنچائیں جہاں ڈاکٹروں نے دم گھٹنے سے موت کی تصدیق کردی۔ دونوں نوجوانوں کا ڈیرہ غازی خان سے تعلق تھا۔
