آرمی چیف جنرل قمر جاوید باجوہ نے بحرین کی قیادت سے ملاقاتیں کرکے پاک بحرین فوجی مشق البدر کا بھی مشاہدہ کیا۔
آئی ایس پی آر کے مطابق آرمی چیف جنرل قمر جاوید باجوہ نے بحرین کا دورہ کیا جس کے دوران آرمی چیف کی بحرین کے ڈپٹی سپریم کمانڈر سے ملاقات کی، آرمی چیف کی بحرین کے ولی عہد شہزاد سلمان بن حماد اور فیلڈ مارشل شیخ خلیفہ بن احمد الخلیفہ سے ملاقات بھی ہوئی۔
آرمی چیف کی بحرینی قیادت سے ملاقاتوں میں خطے کی سیکیورٹی صورتحال پر بھی تبادلہ خیال کیا گیا جب کہ ملاقاتوں میں باہمی دلچسپی کے امور اور دوطرفہ سیکیورٹی اور دفاعی امور زیر بحث آئے۔
آرمی چیف نے بحرین کے مسلح افواج کے سربراہ لیفٹیننٹ جنرل شیخ محمد بن عیسی الخلیفہ سے بھی ملاقات کی، بحرینی قیادت کاپاکستان سے خصوصی تعلقات اور مزید بہتر بنانے کے عزم کا اعادہ کیا۔
ولی عہد شہزادہ سلمان بن حماد نے آرمی چیف جنرل قمر جاوید باجوہ کو بحرین کے ایوارڈ ’’بحرین آرڈر‘‘سے نوازا، آرمی چیف کوبحرین کا یہ ایوارڈ پاک بحرین دفاعی تعاون میں نمایاں خدمات پردیا گیا۔
آرمی چیف جنرل قمر جاوید باجوہ نے پاک بحرین فوجی مشق البدر کا بھی مشاہدہ کیا جب کہ پاک بحرین مشقوں میں تربیت کے معیار کو سراہا، پاک بحرین مشترکہ فوجی مشقیں دہشتگردی کے خلاف عزم کا ثبوت ہیں۔
