لاڑکانہ (نمائندہ جسارت) لاڑکانہ اور گردونواح میں مختلف حادثات و واقعات میں بچے سمیت تین افراد جاں بحق، ایک شخص زخمی۔ لاڑکانہ شہر کے الہٰ آباد محلے میں پانی کے موٹر سے کرنٹ لگنے کے باعث 9 سالہ بچہ مدثر کھوکھر بے ہوش ہوگیا، جسے ورثا نے بے ہوشی کی حالت میں چانڈکا اسپتال کے شعبہ حادثات منتقل کیا، جہاں بچے کے فوت ہونے کی تصدیق کرتے ہوئے لاش ورثا کے حوالے کردی گئی۔ قنبر کے قریب غیبی دیرو روڈ پر تیز رفتار موٹر سائیکل اور گدھا گاڑی میں ٹکر کے نتیجے میں گاؤں دفر کا رہائشی 19 سالہ نوجوان محمد ابراہیم برڑو شدید زخمی ہوئے جسے ورثا نے تشویشناک حالت میں چانڈکا اسپتال کے شعبہ حادثات منتقل کیا، جہاں زخموں کے تاب نہ لاتے ہوئے نوجوان دم توڑ گیا۔ لاڑکانہ شہر کے کھکھرانی بائی پاس روڈ پر تیز رفتار چنگ چی اور موٹر سائیکل میں ٹکر کے نتیجے میں رشید وگن کے گاؤں مسکین آباد کے رہائشی محمد خان بروہی اور ان کے بھائی شفیع محمد بروہی شدید زخمی ہوئے، جنہیں لوگوں نے چانڈکا اسپتال کے شعبہ حادثات منتقل کیا، جہاں زخموں کی تاب نہ لاتے ہوئے محمد خان بروہی دم توڑ گیا جبکہ زخمی کو طبی امداد دی گئی۔ دوسری جانب لاشیں ضروری کارروائی کے بعد ورثا کے حوالے کردی گئیں جبکہ لاشیں گھر پہنچنے پر کہرام مچ گیا۔ ایس ایس پی لاڑکانہ مسعود احمد بنگش کی ہدایات پر اے ایس پی سٹی احمد فیصل چودھری کی سربراہی میں لاڑکانہ پولیس نے جرائم پیشہ افراد کیخلاف کارروائیاں کرتے ہوئے 7 ملزمان کو گرفتار کرکے اسلحہ برآمد کرلیا۔ تھانہ ہٹڑی غلام شاہ پولیس نے وارث بروہی قتل مقدمے کے دو مرکزی ملزمان موسو جتوئی اور ممتاز جتوئی کو، دڑی پولیس نے دو مطلوب ملزمان نواز لہر اور عرفان لہر کو، تعلقہ پولیس نے وگن روڈ سے ملزم صدام ڈیپر کو بغیر لائسنس پستول سمیت، ولید پولیس نے اشتہاری ملزم معشوق چانڈیو کو اور رحمت پور پولیس نے پیر مراد شاہ سے گٹکا فروش ظفر ڈیپر کو دس پیکٹ گٹکوں سمیت گرفتار کرلیا ہے۔ پولیس کے مطابق گرفتار ملزمان کیخلاف مقدمات درج کرکے تفتیش شروع کردی گئی ہے۔
