لاڑکانہ (نمائندہ جسارت) ایس ایس پی لاڑکانہ مسعود احمد بنگش کی ہدایات پر لاڑکانہ پولیس نے جرائم پیشہ افراد کیخلاف کارروائیاں کرتے ہوئے اشتہاری، روپوش و مطلوب 4 ملزمان کو گرفتار کرکے اسلحہ، چنگ چی رکشہ اور موٹر سائیکل برآمد کرلی۔ بقا پور پولیس نے ڈکیتیوں اور پولیس مقابلوں جیسے پانچ سے زائد سنگین نوعیت کے مقدمات میں ملوث و روپوش ملزم مجاہد کھوسو کو پستول اور گولیوں سمیت، ڈکیتی اور سنگین نوعیت کے تین سے زائد مقدمات میں ملوث و روپوش ملزم شیرخان عرف عادل جتوئی کو ریوالر اور گولیوں سمیت، رشید وگن پولیس نے قتل جیسے سنگین مقدمے میں اشتہاری ملزم عباس کھکھرانی کو جبکہ نوڈیرو پولیس نے دوران گشت روپوش ملزم گلاب کھوکھر کو گرفتار کرلیا ہے۔ دوسری جانب علی گوہر آباد پولیس نے شہری نثار لاشاری کی چوری شدہ چنگ چی رکشہ اور باقرانی پولیس نے شہری عطا محمد تنیو کی چوری شدہ موٹر سائیکل برآمد کرکے اصل مالکان کے حوالے کردی۔ پولیس کے مطابق گرفتار ملزمان کیخلاف مقدمات درج کرکے تفتیش شروع کردی گئی ہے۔ قنبر شہداد کوٹ روڈ پر تیز رفتار وین کی ٹکر سے سجاول جونیجو کے گاؤں دلمراد ٹانوری کا رہائشی 5 سالہ بچہ رحمن ٹانوری شدید زخمی ہوگیا، جسے لوگوں نے زخمی حالت میں چانڈکا اسپتال کے شعبہ حادثات منتقل کیا، جہاں زخمی بچے کو طبی امداد دی گئی۔
