ٹھٹھہ (نمائندہ جسارت) کینجھر جھیل کے قریب کھمبو میان کے گائوں گوٹھ عبداللہ گندرو میں آگ لگنے کے سبب باپ کی گود میں سوئی بچی جاں بحق، باپ شدید زخمی، دو گھروں میں موجود 6 بکریاں اور دیگر سامان بھی جل کر خاکستر۔ کینجھر جھیل کے قریب کھمبو میان کے گائوں گوٹھ عبداللہ گندرو میں نیاز گندرو کے دو گھروں میں اچانک آگ لگ گئی، جس کے نتیجے میں باپ کے سینے سے لپٹی 6 ماہ کی معصوم بچی فوزیہ اور اس کا باپ نیاز آگ کے شعلوں کی لپیٹ میں آگئے، معصوم فوزیہ نے موقع پر ہی دم توڑ دیا جبکہ نیاز بری طرح جھلس کر زخمی ہوگیا، جسے فوری طور پر گائوں کے لوگوں نے سول اسپتال مکلی پہنچایا، جہاں اس کی حالت تشویشناک بتائی جاتی ہے، آگ لگنے کے سبب نیاز گندرو کی 6 بکریاں اور گھروں کا پورا سامان جل کر خاستر ہوگیا۔ گائوں کے لوگوں نے اپنی مدد آپ کے تحت آگ پر قابو پاکر دیگر گھروں کو جلنے سے بچا لیا۔ آگ گھروں میں کافی دیر تک لگی رہی، مگر فائر بریگیڈ کو اطلاع دینے کے باوجود فائر بریگیڈ گاڑیاں نہ پہنچ سکیں۔ فائر بریگیڈ گاڑیاں صرف اثر و رسوخ اور کئی افسران کے گھروں پر پانی پہنچانے میں مصروف رہتی ہیں۔ نیاز گندرو اور اسکا خاندان آسمان تلے بیٹھا ہے، ضلعی انتظامیہ یا منتخب نمائندوں کی جانب سے کوئی امداد نہیں کی گئی۔
