پشاور: سکیورٹی فورسز نے صوبائی دارالخلافے میں دہشتگردی کا منصوبہ ناکام بنادیا ہے، سیکیورٹی فورسز نے خیبر کے علاقے میں کارروائی کرکے کالعدم تنظیم کے اہم کمانڈر سمیت 4 دہشتگرد گرفتار کرلیا۔
میڈیا رپورٹس کے مطابق سکیورٹی فورسز اور پولیس نے خفیہ اطلاع پر رات گئے خیبر کے علاقہ سپاہ میں ایک مکان پر چھاپہ مارا جہاں سے کالعدم لشکراسلام کے کمانڈر ذاکر آفریدی سمیت 4 دہشتگردوں کو گرفتار کرلیا، ملزمان کے قبضے سے 3 خودکش جیکٹس برآمد کی گئی۔
ذرائع کا کہنا ہےکہ دہشتگردوں سے 6 دیسی ساختہ بم بھی برآمد ہوئے اور ان کی نشان دہی پر بڈھ بیر میں بھی کارروائی کی گئی جہاں سے دہشتگردوں کے 8 سہولت کاروں کو گرفتار کیا گیا۔
سکیورٹی ذرائع کے مطابق دہشتگردوں اور ان کے سہولت کاروں کو مزید تفتیش کے لیے خفیہ مقام پر منتقل کردیاگیا ہے، ذرائع نے بتایا کہ دہشتگردوں نے 25 دسمبرکوپشاورمیں بڑی کارروائی کی منصوبہ بندی کر رکھی تھی۔
