اسلام آباد میں نیشنل جونیئر اسکواش چیمپئن شپ میں انڈر 13 تا 19 کے مقابلے شروع ہوگئے ہیں جبکہ جاری نیشنل جونیئر اسکواش چیمپئن شپ کے تیسرے روز مختلف کیٹگریز کی فائنل لائن اپ مکمل ہوگئی ہے۔
تفصیلات کے مطابق پاکستان اسکواش فیڈریشن کے تحت جاری ایونٹ کے تیسرے روز 5 کیٹیگریز کے سیمی فائنلز کھیلے گئے جبکہ انڈر 13 کے سیمی فائنل میں محمد زمان نے عمیر عارف اور ہریرہ خان نے یشوا کو شکست دے دی۔
انڈر 15 میں انس علی شاہ نے صبور خان اور یاسین خٹک نے محمود محبوب کو مات دی جبکہ انڈر 17 کے سیمی فائنل میں حذیفہ زاہد نے محمد عماد اور محمدحمزہ نے فہد شریف کو شکست دی ہے۔
دوسری جانب انڈر 19 کے مقابلوں میں نور زمان نے محمد فرحان اور اشب عرفان نے خوشحال ریاض کو ہرایا ہے جبکہ گرلز سیمی فائنل میں زینب خان نے نورالعین کو اور مائرہ حسین نے حرا عقیل کو شکست دے دی ہے۔
واضح رہے ایونٹ کی تمام کیٹگریز کے فائنلز کل اسلام آباد اسپورٹس کمپلیکس میں کھیلے جائیں گے۔
خیال رہے انڈر 13 میں ابراہیم زیب، مبین خان، عمیر عارف، یشوا، حریرہ خان، آذان علی اور یشوا یوسف نے اگلے راؤنڈ میں کوالیفائی کرلیا تھا جبکہ اسکواش کے انڈر 15 کے مقابلوں میں انس علی، آذان خلیل، سخی اللّٰہ ترین، صبور خان، عبداللّٰہ نواز، محمود محبوب، ورن آصف، یاسین خٹک کامیاب رہے۔
انڈر 17 کے مقابلوں میں حذیفہ زاہد، عثمان ندیم، اذلان خاور، محمد عماد، فہد شریف، نعمان خان، خاقان ملک اور محمد حمزہ کامیاب قرار پائے تھے جبکہ انڈر 19 کے اسکواش مقابلوں میں حمزہ شریف، نور زمان، حذیفہ شاہد، فرحان ہاشمی، خوشحال ریاض، فواد حسین، عشب عرفان، اسداللّٰہ خان کامیاب ہوئے تھے۔
دوسری طرف گرلز سنگلز میں زینب خان ، نمرا عقیل ،نور العین ،فجر حمید ، زہرا عبداللّٰہ، حرا عقیل، مائرہ حسین، سبغا ارشد کامیاب رہی ہیں۔
