لاہور (نمائندہ جسارت)وزیر ریلوے شیخ رشید احمد نے کہا ہے کہ شہباز شریف، نواز شریف کے غیر سیاسی اور غیر اخلاقی بیان کے سامنے نہیں کھڑے ہو سکتے، مریم نواز نے نواز شریف کے بیانیے کی نفی کی۔لاہور میں پریس کانفرنس کرتے ہوئے کہا کہ جہانگیر ترین واپس آگئے ہیں، اب نوازشریف کو بھی آجانا چاہیے ، نواز شریف کو معلوم ہے کہ ان کی سیاست ختم ہوچکی ہے، مریم نواز بھی نااہل ہیں، انہوں نے شہباز شریف کو مفلوج کردیا ہے، شہباز شریف، نواز شریف کے غیر سیاسی اور غیر اخلاقی بیان کے سامنے نہیں کھڑے ہو سکتے، اس لیے وہ چاہتے ہیں کہ ان کی اگلی نسل کا کوئی راستہ نکلے، مریم نواز نے بات کرنے کے لیے پی ڈی ایم کی چھتری کا سہارا لیا ہے۔ مریم نواز نے نواز شریف کے بیانیے کی نفی کی ہے، وہ ایک ٹکٹ میں 2 مزے لے رہی ہیں، ان کے پیر زمین پر بھی ہیں اور وہ آسمان کو بھی چھورہی ہیں۔ شیخ رشید کا کہنا تھا کہ پی ڈی ایم کے سارے لوگ
نوازشریف کے بیانیے کے ساتھ نہیں، مولانا فضل الرحمان اور ن لیگ کا بیانہ قریب قریب ہے، پیپلز پارٹی ان کے ساتھ نہیں چلے گی۔ وزیر اعظم کورونا کے باوجود معیشت میں استحکام لائے ہیں، آرمی چیف کہہ چکے ہیں کہ پاک فوج منتخب حکومت کے ساتھ ہے، عمران خان محنت کررہے ہیں، 30 دسمبر سے پہلے مہنگائی کو کنٹرول کرلیں گے، وزیراعظم عمران خان 5 سال پورے کریں گے۔ عمران خان حکومت میں رہیں یا نہ رہیں،وہ کسی کرپٹ سے معاملہ نہیں کر سکتے۔وزیر ریلوے کا کہنا تھا کہ بھارت پاکستان کواندورنی طور پر کمزور کرنا چاہتا ہے، وہ پاکستان اور چین کے درمیان سی پیک معاہدہ نہیں دیکھنا چاہتا، بھارت سرحدوں پر پاکستان کا کچھ نہیں بگاڑ سکتا، اسلیے پاکستان میں دہشت گردکارروائیاں ہوسکتی ہیں، را نے پاکستان کو غیر مستحکم کرنے کے لیے کارروائیاں شرو ع کردی ہیں، پاکستان سیاستدانوں کی زندگی کو خطرات لاحق ہیں، را کسی بھی بڑے سیاست دان کو نقصان پہنچا سکتی ہے۔ پاکستان میں کورونا پھیل رہا ہے،اس لیے جلسے جلسوں سے اجتناب کیا جانا چاہیے۔ میں کورونا سے گزر چکا ہوں، 4 ماہ بعد بھی نارمل نہیں ہو سکا۔شیخ رشید نے گلگت بلتستان کے انتخابات کے حوالے سے کہا کہ امید ہے گلگت بلتستان میں پی ٹی آئی حکومت بنائے گی۔
لاہور: وزیر ریلوے شیخ رشید احمد پریس کانفرنس کررہے ہیں
