لاڑکانہ (نمائندہ جسارت) رتو ڈیرو شہر کے اسٹیڈیم کے علاقے میں پرانی دشمنی پر مسلح افراد نے فائرنگ کرکے رتو ڈیرو شہر کے جوگی محلہ کے رہائشی نوجوان صدام علی بوزدار کو شدید زخمی کردیا۔ اطلاع پر حد کے تھانہ رتو ڈیرو کی پولیس نے پہنچ کر زخمی نوجوان کو چانڈکا اسپتال کے شعبہ حادثات منتقل کیا جہاں انہیں طبی امداد دی گئی۔ زخمی کے چچا زاد بھائی نثار بوزدار کے مطابق ان کی بھٹی برادری سے پرانی دشمنی ہے، موٹر سائیکل سوار مسلح افراد صدام پر فائرنگ کرکے زخمی کرنے کے بعد فرار ہوگئے۔ دوسری جانب آخری اطلاع موصول ہونے تک واقعے کا مقدمہ درج نہ ہوسکا اور نہ کوئی گرفتاری عمل میں آسکی۔
