لاڑکانہ (نمائندہ جسارت) ایس ایس پی لاڑکانہ مسعود احمد بنگش کی ہدایات پر لاڑکانہ پولیس نے جرائم پیشہ افراد کیخلاف کارروائیاں کرتے ہوئے 5 ملزمان کو گرفتار کرکے اسلحہ، منشیات، چنگ چی رکشہ اور نقدی برآمد کرلی۔ رشید وگن پولیس نے دوران گشت جانوری سیم شاخ کے قریب ملزم عرفان شیخ کو پستول اور گولیوں سمیت، گڑہی خدا بخش بھٹو پولیس نے ملزم عجیب جیہو کو بندوق اور کارتوسوں سمیت، رحمت پور پولیس نے دوران چیکنگ ملزم عاشق کھوکھر کو چرس سمیت اور دڑی پولیس نے روپوش ملزم وسیم لغاری اور منشیات فروش نعمت اللہ بروہی کو چرس سمیت گرفتار کرلیا۔ دوسری جانب حیدری پولیس نے شہری ذیشان لانگاہ کا چوری شدہ چنگ چی رکشہ اور شہری ساجد سانگی سے چھینی جانے والی نقدی اور موبائل فون برآمد کرکے اصل مالکان کے حوالے کرکے تمام ملزمان کیخلاف مقدمات درج کرکے تفتیش شروع کردی ہے۔ قنبر شہر میں 12 سالہ بچہ محمد چانڈیو گھر کی چھت پر کھیلنے کے دوران بجلی کی تاروں سے کرنٹ لگنے کے باعث جھلس کر شدید زخمی ہوگیا، جسے ورثاء نے زخمی حالت میں چانڈکا اسپتال کے شعبہ حادثات منتقل کیا، جہاں بچے کا جسم 75 فیصد جھلسنے کی تصدیق کرتے ہوئے انہیں طبی امداد دی گئی۔ دوسری جانب آخری اطلاع موصول ہونے تک جھلس کر زخمی ہونے والے بچے کا علاج جاری تھا۔
