کرپشن ورپشن کے الزامات سب ڈرامہ ہیں، خورشید شاہ

سکھر( آن لائن) پاکستان پیپلز پارٹی کے رہنما اور رکن قومی اسمبلی خورشید شاہ نے کہا ہے کہ کرپشن ورپشن کے الزامات سب ڈرامہ ہیں، عوام ووٹ کرپشن کے خاتمے کے لیے نہیں مسائل کے حل کے لیے دیتے ہیں۔ احتساب عدالت کے باہر میڈیا سے گفتگو کرتے ہوئے
انہوں نے کہا کہ جو مہنگائی پر بات نہیں کریں گے، سمجھیں وہ ملک کے ساتھ نہیں ہیں۔ انہوںنے کہاکہ بچپن میں مہنگائی کی جو کہانیاں سنتے تھے وہ اب سامنے آ رہی ہیں۔ عمران خان حقیقت کو محسوس کریں کہ عوام ووٹ کیوں دیتے ہیں۔ امریکی انتخابات پر تبصرہ کرتے ہوئے خورشید شاہ نے کہا کہ جوبائیڈن کی کامیابی سے خطے میں تبدیلی آسکتی ہے، ٹرمپ کی وجہ سے امریکا میں تبدیلی آئی، لوگ کلہاڑیاں، بندوقیں لے کر باہر آ گئے ہیں۔