دانشوروں کا سول ایوارڈ لینے سے انکار قابل تشویش ہے‘ رضا ربانی

اسلام آباد (صباح نیوز) سابق چیئرمین سینیٹ اور پیپلزپارٹی کے رہنما رضا ربانی نے کہا ہے کہ یہ بات قابل تشویش ہے کہ پاکستانی دانشور سول ایوارڈ لینے سے معذرت کر رہے ہیں۔ یہ بات انہوں نے ایک بیان میں کہی۔ رضا ربا نی کا کہنا تھا کہ پہلے تاج جویو نے بیٹے کے لاپتا ہونے پر حسن کارکردگی ایوارڈ لینے سے انکار کیا، اب شاعرہ فہمیدہ نسرین کی بیٹی نے صحافیوں کے اغوا اور تشدد پرمرحوم والدہ کے لیے ایوارڈ نہیں لیا۔انہوں نے کہا کہ یہ دونوں کیسز فاشسٹ پالیسی کے خلاف پیدا ہونے والی مایوسی کے عکاس ہیں، جہاں دانشور سوچ کو ریاستی پالیسی کے تحت دبایا
جارہا ہو وہ معاشرہ مردہ ہوجاتاہے، تاریخ گواہ ہے جہاں حکمران اشرافیہ نے دانشوروں کا گلا گھونٹا وہ معاشرہ تاریخ کے کوڑے دان میں گیا، خبردارکرتاہوں اگر دانشوروں کو بڑھنے نہیں دیا تو آپ وفاق کو تباہی کے دہانے پر لے جائیں گے۔