نوابشاہ (سٹی رپورٹر) جام صاحب روڈ پر واقع گجرواہ نہر کا پل زمین بوس ہوگیا، ٹریفک کی روانی معطل ہوگئی، سیکڑوں دیہات کو جانے والا راستہ گرنے کے باعث دیہی علاقوں کے عوام اپنے گھروں کو نہ پہنچ سکے۔ اطلاعات کے مطاق گجرواہ نہر کے پل پر سامان سے لدا ہوا ٹرک گزر رہا تھا کہ کھڈے سے گزرنے کی وجہ سے الٹ گیا۔ بتایا جارہا ہے کہ پل نہایت پرانا اور خستہ حالی کا شکار ہونے کے ساتھ ساتھ گزرنے کے لیے نہایت کم راستہ رکھتا ہے، جس پر محکمہ انہار نے کبھی توجہ دی ہے نہ اس کی مرمت کروائی ۔ ٹرک الٹ جانے کی وجہ سے گائوں اور دیہات کو جانے والا یہ واحد راستہ بند ہوگیا ہے جس کی وجہ سے عوام کو شدید سفری دشواریوں کا سامنا کرنا پڑ رہا ہے جبکہ ضلعی انتظامیہ نے اس حوالے سے خاطر خواہ انتظامات نہیں کیے۔
