کراچی( اسٹاف رپورٹر )الصغیر ہاکی کلب کے سینئرز، ویٹرنز اور جونیئر کھلاڑیوں کے اعزاز میں الصغیر ہاکی کلب کے سابق کپتان و سابق انٹرنیشنل ہاکی کھلاڑی مبشر مختار کی رہائش گاہ پرایک پرتکلف عشائیہ کا اہتمام کیاگیا، اس یاد گار تقریب میں نارتھ کراچی یونین کونسل 4کے چیئر مین راحت حسین نے بھی خصوصی طور پر شرکت کی، اس موقع پر الصغیر ہاکی کلب کی کور کمیٹی کا اجلاس بھی منعقد ہوا، جس میں الصغیر ہاکی کلب کے 35 سال مکمل ہونے پر پروقار تقریب کے انعقاد کو زیر غور لایا گیا اور فیصلہ کیا گیا کہ اس تاریخی موقع کو شایان شان طریقے سے منایا جائیگا، اس حوالے سے عنقریب جونیئرز، سینئرز اور ویٹرنز کھلاڑیوں پر مشتمل نمائشی ہاکی میچ کا انعقاد بھی کیا جائیگا، تاکہ کلب کے سینئرز اور جونیئرز کھلاڑیوں کو پھر سے ری یونین کیا جاسکے۔ کور کمیٹی کے اجلاس کی صدارت الصغیر ہاکی کلب کے سیکریٹری عظمت پاشا نے کی۔ چیئرمین سید صغیر حسین سمیت ممبران سابق انٹرنیشنل ہاکی پلیئر مبشر مختار، مسرور جاوید، عابد علی، نعیم حیدر، طارق خان اور سمیر سلیم اور دیگر ممبران نے الصغیر ہاکی کلب کی ویٹرنز ٹیم کے قیام کے حوالے سے تجاویز دیں، جسے کور کمیٹی نے منظور کرتے ہوئے فیصلہ کیا کہ آئندہ کراچی اور کراچی سے باہر منعقد ہونیوالے ویٹرنز ہاکی ٹورنامنٹ میں الصغیر ہاکی کلب کی ٹیم بھی شرکت کریگی۔
