راولپنڈی: آرمی چیف جنرل قمر جاوید باجوہ اور ڈی جی آئی ایس آئی لیفٹیننٹ جنرل فیض حمید آج سعودی عرب کے دورے پر روانہ ہوں گے۔
ترجمان پاک فوج کا کہنا ہے کہ آرمی چیف کا دورہ سعودیہ پہلے سے طے شدہ تھا، اس دورے کا مقصد دفاعی تعلقات کو مزید بہتر بنانا ہے۔
دو سینیئر فوجی حکام نے دورے کی حوصلہ افزائی کرتے ہوئے رائٹرز کو بتایا کہ ریاض پاکستان کی تنقید پر سخت ناراض ہے کہ سعودی عرب کشمیر کے علاقائی تنازع پر کچھ نہیں کر رہا۔
پاک فوج کے ترجمان میجر جنرل بابر افتخار نے رائٹرز کو بتایا کہ “ہاں وہ سفر کر رہے ہیں، یہ دورہ پہلے سے طے شدہ تھا اور بنیادی طور پر فوجی امور پر مبنی تھا”۔
پاکستان اور سعودی عرب روایتی برادر اسلامی ملک اور انتہائی قریبی تعلقات رکھتے ہیں لیکن گزشتہ ایک ہفتے سے تعلقات میں سردمہری ہے۔
ہر مشکل وقت میں پاکستان کے ساتھ کھڑے ہیں: سعودی سفیر
لاہور: سعودی سفیر نواف سعید المالکی نے پاکستانیوں کو یوم آزادی کی مبارکباد دیتے ہوئے کہا ہے کہ سعودی عرب ہر مشکل وقت میں پاکستان کے ساتھ کھڑا ہے۔
سعودی سفیر نواف سعید المالکی نے مسلم لیگ ق کے صدر چودھری شجاعت حسین اور چودھری پرویز الٰہی سے ملاقات کی، ملاقات کے دوران طارق بشیر چیمہ مونس الٰہی، شافع حسین اور راسخ الٰہی بھی موجود تھے۔
ملاقات میں ملکی سیاسی صورتحال اور باہمی دلچسپی کے امور پر تبادلہ خیال کیا گیا۔
مسلم لیگ ق کے سربراہ چودھری شجاعت حسین اور مسلم لیگ ق پنجاب کے صدر چودھری پرویز الٰہی کا کہنا تھا کہ سعودی عرب اور پاکستان اسلامی بھائی چارے کے بندھن میں بندھے ہیں، دنیا کی کوئی طاقت اس بھائی چارے کو کم نہیں کر سکتی۔
چودھری برادران کا کہنا تھا کہ سعودی عرب سے محبت اور عقیدت میں روز بروز اضافہ ہوتا جا رہا ہے، سعودی فرمانروا شاہ سلمان اور ولی عہد محمد بن سلمان کے دنیا میں پاکستان کے سفیر ہونے پر مشکور ہیں۔ شاہ سلمان اور محمد بن سلمان پاکستان کے مسائل سے آگاہ ہیں۔ پاکستانیوں کے دل مکہ مدینہ میں دھڑکتے ہیں۔
پرویز الٰہی اور چودھری شجاعت کا کہنا تھا کہ وبائی امراض پر کافی حد تک قابو پا لیا گیا ہے لیکن ابھی بھی محرم الحرام میں ایس او پیز کا خاص خیال رکھنے کی ضرورت ہے۔
ملاقات کے دوران سعودی سفیر نے چودھری صاحبان کو پاکستان کے یوم آزادی پر مبارکباد پیش کرتے ہوئے کہا کہ سعودی عرب ہر مشکل وقت میں پاکستان کے ساتھ کھڑا ہے۔
ان کا کہنا تھا کہ شجاعت حسین اور پرویز الٰہی کے سعودی عرب کے بارے میں نیک اور اچھے خیالات جان کر خوشی ہوئی، کورونا کے ایس او پیز کو مدنظر رکھتے ہوئے جلد عمرہ کی سعادت حاصل کرنے والے زائرین کو سعودی عرب آنے کی اجازت مل جائے گی۔
