کوئٹہ (نمائندہ جسارت) بلوچستان میں فائرنگ، ٹریفک حادثات اور دیگر واقعات میں تین افراد جاں بحق اور چار زخمی ہوگئے۔ کوئٹہ کے مصروف ترین لیاقت بازار میں نامعلوم مسلح افراد نے جیولرز کی دکان میں گھس کی فائرنگ کردی جس کے نتیجے میں محمد اسماعیل ولد حاجی سعید محمد کاکڑ موقع پر جاں بحق ہوگیا، واقعہ کے بعد لاش کو ضروری کارروائی کے لیے سول اسپتال منتقل کیا گیا۔ دشت کے علاقے میں دو موٹر سائیکلوں میں تصادم کے نتیجے میں ایک شخص جاں بحق اور دو زخمی ہوگئے، متوفی کی شناخت عبدالباقی ولد فیض محمد جتک کے نام سے ہوئی ہے جبکہ زخمیوں میں حضور بخش ولد فیض محمد جتک اور بہرام ولد عبدالستار شامل ہیں۔ کوئٹہ کے علاقے مشرقی بائی پاس میں کرنٹ لگنے سے دو افراد زخمی ہوگئے، زخمیوں میں باز محمد اور دلاور شامل ہیں، واقعے کے بعد زخمیوں کو طبی امداد فراہم کرنے کے لیے سول اسپتال کوئٹہ منتقل کردیا گیا۔ بلوچستان کے علاقے سوراب میں فائرنگ سے ایک شخص جاں بحق ہوگیا، پولیس کے مطابق سوراب بازار میں نامعلوم مسلح افراد نے ایک شخص پر فائرنگ کردی اور فرار ہوگئے، واقعے کے بعد لاش کو شناخت کے لیے ڈی ایچ کیو سوراب منتقل کردیا گیا۔
