لاہور (آن لائن) اسپیکر پنجاب اسمبلی چودھری پرویزالٰہی نے علامہ ساجد نقوی، مفتی منیب الرحمن، مفتی راغب نعیمی، پیر امین الحسنات شاہ، سید سبطین حیدر سبزواری، سید صفدر شاہ، سابق ایم پی اے سید تقلید رضا شاہ آف تلہ گنگ، علامہ گلفام ہاشمی سے تحفظ بنیاد اسلام بل سے متعلق ٹیلیفون پر مشاورت کی ہے۔ اس موقع پرویزالٰہی کا کہنا تھا کہ تحفظ بنیاد اسلام بل سے تمام مسالک کے درمیان اتحاد و پیار مزید مضبوط ہوگا، ہم اہل بیت اطہار اور تمام صحابہؓ کے غلام ہیں، ہمارے یا ہماری نسلوں کے ہوتے ہوئے خاتم النبیین حضرت محمد رسول اللہ صلی اللہ علیہ وآلہ وسلم، تمام خلفائے راشدین، امہات المومنین، اہل بیت اطہار اور اصحاب رسول رضوان اللہ تعالیٰ علیہم اجمعین کی شان میں گستاخی نہیں ہو سکتی۔ تحفظ بنیاد اسلام بل کے تحت تمام کتابوں میں خاتم النبین حضرت سیدنا محمد رسول اللہ صلی اللہ علیہ وآلہ وسلم لازمی لکھا جائے گا، تمام حضرات اہل بیت اطہار، تمام ازواج مطہرات(امہات المومنین) تمام صاحبزادیوں، صاحبزادوں، تمام نواسوں اور نواسیوں کیلیے علیہ السلام یا سلام اللہ علیہا یا رضی اللہ عنہ یا رضی اللہ عنہا لازمی لکھا جائے گا۔ حضرات اہل بیت اطہار کے ناموس پر ہمارا سب کچھ قربان ہے۔ اہل بیت سے محبت ہمارے ایمان کا حصہ ہے۔ چودھری پرویزالٰہی نے کہا مجھ سمیت تمام اسمبلی نے پاکستان کی تاریخ میں سب سے پہلے متفقہ طور پر وہ کتب ضبط کرنے کا حکم دیا جس میں حضرت علی کرم اللہ وجہہ الکریم سمیت اہل بیت اطہار کی شان میں گستاخی کی گئی تھی۔ یہ ہمارے اہل بیت اطہار سے عشق کا عملی ثبوت ہے۔
