عمران خان مراد سعید کی اہلیت ثابت کریں‘قادر پٹیل

اسلام آباد ( آن لائن)پیپلز پارٹی کے رکن قومی اسمبلی قادر پٹیل نے کہا ہے کہ عمران خان بتائیں مراد سعید میں کونسی اہلیت ہے جوایم این اے بنوا دیا ہے، مراد سعید بتائیں انہوں نے 200 ارب ڈالر کہاں چھپا رکھے ہیں جو آئی ایم ایف کے منہ پر مارنے تھے؟۔ان خیالات کااظہار انہوں نے تحریک انصاف کے رکن قومی اسمبلی مراد سعید کی میڈیا گفتگو کے رد عمل پرکیا۔قادر پٹیل نے کہا کہ جعلی ڈگری والے مراد سعید میرے چیلنجز سے گھبراگئے، ایک دن میں3 پرچے دینے والے مراد سعید ہمت کریں اور میرے چیلنجز کا جواب دیں، عمران خان مراد سعید کے پیچھے چھپنے کے بجائے خود سامنے آئیں،عمران خان اپنی چینی
چوری اور آٹا چوری پکڑے جانے پر مراد سعید کو دوسروں پر الزام تراشی کے لیے آگے کررہے ہیں۔انہوں نے کہا کہ سابق صدر زرداری پر مقدمات کی بات کرنے والے مراد سعید اپنے والد کے آسٹریلیا میں جعلی اسٹوڈنٹ ویزے پرگرفتاری کا بتائیں۔ان کا کہنا تھا کہ مراد سعید بتائیں کہ وہ 200 ارب ڈالرز کہاں ہیں جن کا انتخابات سے قبل آپ نے انکشاف کیا تھا، اگر مراد سعید نے 200 ارب ڈالرز کا نہیں بتایا تو میں خود ان کی تلاشی لوں گا۔