اسلام آباد:اسلام آباد ہائیکورٹ کے چیف جسٹس اطہر من اللہ نے سینئر صحافی مطیع اللہ جان کو بازیاب کرانے کا حکم دے دیا۔
تفصیلات کے مطابق اسلام آباد ہائی کورٹ کے چیف جسٹس اطہر من اللہ نے مغوی کے بھائی کی درخواست پر احکامات جاری کیے ہیں، درخواست گزار نے بیرسٹر جہانگیر جدون کے ذریعے سینئر صحافی کی بازیابی کی درخواست جمع کرائی تھی۔
عدالت نے سیکریٹری داخلہ، چیف کمشنر اور آئی جی پولیس کو نوٹس جاری کرتا ہوئے کہا ہے کہ اگر مطیع اللہ جان کو بازیاب نہیں کرایا جا سکا تو فریقین کل ذاتی حیثیت میں پیش ہوں۔
اسلام آباد ہائیکورٹ نے احکامات جاری کرتے ہوئے کہا کہ رجسٹرار آفس خصوصی نمائندے کے ذریعے فریقین کو عدالتی نوٹس فوری بھیجیں۔
عدالت نے کہا کہ درخواست گزار کے مطابق صحافی مطیع اللہ جان کو دن دیہاڑے اسلام آباد سے اغوا کیا گیا،یہ مبینہ طور پر جبری گمشدگی کا مقدمہ ہے،انتظامیہ پیش ہوکر بتائے کیوں نا ایسے واقعات کے ذمہ داروں کے خلاف کاروائی کی جائے۔
خیال رہے کہ آج دوپہر کو صحافی مطیع اللہ جان لاپتہ ہوئے ، واقعہ کی سی سی ٹی وی فوٹیج سامنے آئی ہے جس میں دیکھا گیا کہ کچھ لوگ انہیں زبردستی گاڑی میں بٹھاکر لے گئے ہیں ۔
اہلیہ نے اپنے بیان میں کہا کہ ’ مجھے بتایا گیا کہ میرے شوہرکو کچھ لوگ زبردستی اپنے ساتھ لے گئے‘۔
پولیس کا کہنا ہےکہ مطیع اللہ جان کے لاپتا ہونے کے معاملے کی تحقیقات کررہے ہیں۔
